Рус Бел Eng 中文

Бабруйск і Горкі – пераможцы конкурсу майстроў ландшафтнага дызайну

Горад Горкі літаральна патанаў у кветках: тут прайшоў VI конкурс прафесійнага майстэрства «Магілёўскі майстар – 2018» па прафесіі рабочы зялёнага будаўніцтва. Удзельнікі творчага спаборніцтва падарылі гараджанам 18 дэкаратыўных кветнікаў і кветкавых кампазіцый.

Работы размясціліся на цэнтральных вуліцах раённага цэнтра, а таксама на ўездах у Горкі. Кожная з увасобленых канкурсантамі ідэй была па-свойму цікавая і заняла годнае месца ў гарадскім ландшафце. Напрыклад, работнікі ЖКГ з Чэрыкава здзівілі 4,5-метровым кветкавым караблём, прадстаўнікі Магілёўскага раёна – цёплым і ўтульным кветнікам-самабранкай з упрыгожаным самаварам.

Пры ацэнцы работ журы звяртала ўвагу на адпаведнасць кампазіцыі праектнаму вырашэнню, арыгінальнасць ідэі і яе граматнае ўвасабленне, уменне выкарыстоўваць рэльеф і спалучаць колер, захаванне тэхналогіі пасадкі і многае іншае. Немалаважна было і прафесійнае чуццё, якое ператварала праекты ўдзельнікаў у сапраўдныя кветкавыя шэдэўры.

«Шосты абласны конкурс майстроў ландшафтнага дызайну мы прысвяцілі Году малой радзімы, што знайшло адлюстраванне не толькі ў саміх кветкавых клумбах, але і ў тым, з якой любоўю да сваіх гарадоў, раёнаў і ўсёй нашай краіне канкурсанты прадстаўлялі работы, – пракаментаваў вынікі конкурсу намеснік старшыні абласной арганізацыі прафсаюза работнікаў мясцовай прамысловасці і камунальна-бытавых прадпрыемстваў Павел Жуйкоў. – Таму журы было надзвычай цяжка вызначыць пераможцаў: як вынік – першае месца падзялілі адразу два прадпрыемствы-ўдзельнікі».

Перамогу ў конкурсе атрымалі каманды Бабруйскага УКД дарожна-эксплуатацыйнага прадпрыемства і Горацкага УКПП «Камунальнік». Другое месца замацавалася за Магілёўскім УКП «Жылкамгас». Трэцяе месца прысуджана камандзе Дрыбінскага УКП «Жылкамгас».

Таксама журы адзначыла пераможцаў у асобных намінацыях. Так, дыплом за «Адпаведнасць кампазіцыі праектнаму рашэнню» ўручаны Крычаўскаму УКПП «Камунальнік» і Глускаму УКП «Жылкамгас», за «Аб’ёмна-планіровачнае і прасторавае рашэнне» – Клімавіцкаму УКП «Камунальнік» і УКВП «Чэрыкаўскі жылкамунгас», за «Выкарыстанне малых архітэктурных формаў» – Асіповіцкаму УКП жыллёва-камунальнай гаспадаркі і Шклоўскаму УКП «Жылкамгас».

Намінацыя «Мінімалізм і практычнасць» прысуджана Бялыніцкаму УКП «Жылкамгас» і Кіраўскаму УКП «Жылкамгас», «Арыгінальнасць кампазіцыйнага рашэння» – Чавускаму УКП «Жылкамгас» і Быхаўскаму УКП «Жылкамгас», «Гарманічнасць кветкавых спалучэнняў» – прадпрыемству «Касцюковіцкі жылкамунгас», «Разнастайнасць пасадачнага матэрыялу ў кампазіцыі» – Хоцімскаму УКП «Жылкамгас», «Шчыльнасць пасадкі і стан раслін» – Клічаўскаму УКП «Жылкамгас», «Гарманічнасць кампазіцыі» – Мсціслаўскаму УКПП «Жылкамгас».

Усе канкурсанты ўзнагароджаны дыпломамі і каштоўнымі падарункамі.

Пры выкарыстанні матэрыялаў актыўная гіперспасылка на mogilev-region.gov.by абавязковая