Рус Бел Eng 中文

Больш за 100 мерапрыемстваў запланавана ў Магілёве да Новага года і Каляд

Больш за 100 мерапрыемстваў запланавана ў Магілёве да Новага года і Каляд. Пра гэта паведаміла начальнік упраўлення культуры гарвыканкама Ірына Жабарава.

У чарадзе святочных забаў знайшлося месца як для ўпадабаных жыхарам абласнога цэнтра мерапрыемстваў, так і для новых. Многія традыцыйныя дзействы памяняюць фармат. Нязменнымі застануцца іх душэўная атмасфера, маляўнічасць і запал.

 

Выстава-кірмаш «Калі ёлкі былі вялікімі…»

Пераднавагодняя праграма стартуе ўжо 10 снежня з адкрыцця выставы-кірмашу «Калі ёлкі былі вялікімі...» у Гарадской выставачнай зале. Свае вырабы прадставіць грамадскае аб’яднанне магілёўскіх рамеснікаў «Шчырая майстэрня». Умельцы таксама правядуць майстар-класы, падчас якіх магілёўцы змогуць зрабіць навагоднія цацкі сваімі рукамі і ўпрыгожыць імі ўсталяваную ў зале ёлку. 

Тут жа размесціцца выстава асабліва цёплых фатаграфій. У яе фарміраванні запрашаюць прыняць удзел жыхароў горада на Дняпры. У кожнага ў фотаальбоме ёсць дарагія сэрцу здымкі, дзе захаваны шчаслівыя моманты святкавання Новага года ў дзяцінстве – дома з сям’ёй, у дзіцячым садзе, на вуліцы. Гэтыя работы могуць стаць часткай экспазіцыі, варта толькі прынесці іх у выставачную залу да 9 снежня.

 

Святочны кірмаш «Гарадок навагодніх жаданняў»

Святочны кірмаш «Гарадок навагодніх жаданняў» адкрыецца ў Камсамольскім скверы 25 снежня. Штодня да 31 снежня з 10.00 тут будуць прадаваць тэматычную сувенірную прадукцыю, цацкі, ёлачныя ўпрыгожванні, гірлянды, карнавальныя касцюмы, жывыя і штучныя елкі. Арганізуюць фотазоны і месцы для адпачынку. Запланаваны канцэртныя і тэатралізаваныя прадстаўленні з забавамі, гульнямі і сувенірамі.

 

Цырымонія запальвання агнёў на галоўнай ёлцы Магілёва

Адкрыццём асноўных навагодніх і калядных мерапрыемстваў паслужыць цырымонія запальвання агнёў на галоўнай ёлцы Магілёва 22 снежня на плошчы Леніна.

Перад пачаткам дзейства каля абласнога дыягнастычнага цэнтра адбудзецца танцавальны флэшмоб з удзелам гараджан і навагодніх персанажаў.

Затым на сімвалічным троне Дзед Мароз і Снягурка ў суправаджэнні світы з казачных герояў і пад музыку духавога аркестра пройдуць да галоўнай ёлкі. На плошчы Леніна вясёлая казачная кампанія зробіць круг пашаны, павіншуе ўсіх з надыходзячымі святамі і запаліць агні на зялёнай Прыгажуні з удзелам кіраўніцтва горада.

Працягне вечар мюзікл па рускай народнай казцы «Марозка» і моладзевая дыскатэка.

 

Ледзяная рэзідэнцыя Дзеда Мароза

У Паднікольскім парку Магілёва пабудуюць ледзяную рэзідэнцыю галоўнага персанажа Новага года. З лёду, які прыбудзе з Урала ўжо на наступным тыдні, зробяць вялікія фігуры Дзеда Мароза і Снягуркі, трон, аленевую запрэжку, казачны лес.

Адкрыццё рэзідэнцыі адбудзецца 25 снежня. А з 23 снежня па 1 студзеня тут штодзённа з 13.00 да 14.00 будзе праходзіць навагодні перформанс «Чараўніцтва ў зімовым парку».

 

Анлайн-атракцыён «Інтэрактыўны Дзед Мароз»

На плошчы Зорак з 26 па 30 снежня з 17.00 да 18.30 і 31 снежня з 13.00 да 14.30 арганізуюць анлайн-атракцыён «Інтэрактыўны Дзед Мароз». Кожнае дзіця, і нават дарослы, зможа патэлефанаваць галоўнаму казачнаму персанажу і ў рэжыме рэальнага часу праз святлодыёдны экран пагутарыць з ім.

 

Штодзённая праграма на плошчы Зорак

З 25 студзеня пачне актыўна працаваць святочная сцэна на плошчы Зорак. Штодня з 13.00 да 21.00 тут будуць праходзіць канцэрты і забаўляльныя праграмы, у тым ліку прадстаўленне для дзяцей «Навагодняя казка казак, або таямніца чароўнага кія», крэатыў-праект «Навагодняя скарбонка добрага настрою», моладзевыя дыскатэкі, адкрытыя кінапаказы навагодніх рэтра-фільмаў.

 

Тэатралізаванае шэсце

Традыцыйна 25 снежня ў Магілёве адбудзецца тэатралізаванае пераднавагодняе шэсце. Яно стартуе ў 12.00 з вуліцы Міронава і пройдзе па вуліцы Першамайскай да плошчы Славы.

На чале карнавальнай калоны будуць ехаць на квадрацыклах галоўны Дзед Мароз горада са Снягуркай. За імі пройдуць вялікія ёлачныя шары і сімвалы Новага года – жывыя парасяты.

Усяго магілёўцаў павітае каля 250 Дзядоў Марозаў ад прадпрыемстваў і навучальных устаноў горада. У тэатралізаваным паказе задзейнічаюць шмат іншых казачных і навагодніх персанажаў: Снежную каралеву, Шчаўкунчыка, Санта-Клауса, снегавікоў, гномаў. Фіналам шэсця стане навагодні карнавал.

 

Лыжны забег Дзядоў Марозаў

У Паднікольскім парку Магілёва 29 снежня адбудзецца навагодні лыжны забег «Самы хуткі Дзед Мароз». Паўдзельнічаць у спаборніцтве змогуць усе, хто пажадае. Абавязковая ўмова – у касцюме Дзеда Мароза ці хаця б з элементамі такога касцюма.

Працягласць маршруту складзе да 1 км. Калі будуць заяўкі ад юных магілёўцаў, то для іх зробяць асобны забег на больш кароткую дыстанцыю.

 

Навагодняя ноч

Асноўныя гулянні ў навагоднюю ноч разгорнуцца на плошчы Славы з 1.00 да 5.00. Падчас танцавальна-забаўляльнай праграмы «Таямніца навагодняй ночы» Снягурка разам з магілёўцамі і казачнымі памочнікамі будзе шукаць Дзеда Мароза, які згубіўся.

Святкаванні з 1.00 да 3.00 пройдуць і на іншых адкрытых пляцоўках горада: каля Дома культуры ААТ «Магатэкс», па вул. С. М. Кірава, каля кінатэатра «Космас».

 

Акцыя па вырабе фігур са снегу

Напярэдадні праваслаўнага Раства, 5 студзеня ў 12.00, у Падніколлі запланавана правядзенне акцыі па вырабе фігур са снегу «Магілёў, я дару табе казку!». Чакаецца ўдзел не менш за 20 каманд, якія прадставяць навучальныя ўстановы, установы і прадпрыемствы. Найлепшыя працы будуць адзначаны салодкімі прызамі.

 

Народнае свята «Каляды»

У 2019 годзе для правядзення народнага свята «Каляды» задзейнічаюць дзве пляцоўкі.

Апоўдні магілёўцаў і гасцей горада на цэнтральнай сцэне Пячэрскага лесапарку чакае тэатралізаваны паказ, забаўляльная праграма з жартамі, прымаўкамі, анекдотамі, рухомымі гульнямі, танцамі, віктарынамі і конкурсамі.

Падчас мерапрыемства будзе арганізаваны гарадскі конкурс «У зімовым лесе». Традыцыйнае спаборніцтва «Добрая ўшыца наша!» заменіць кулінарнае спаборніцтва па падрыхтоўцы розных супоў. Заяўкі на ўдзел у конкурсе прымаюцца да 1 студзеня. Найлепшай стане не толькі каманда, якая прыгатуе самую смачную страву, але і вызначыцца ва ўменні жартаваць, весці здаровы лад жыцця.

Адначасова на плошчы Зорак адбудзецца тэатралізаванае прадстаўленне «Пайшла Каляда калядуючы».

На абедзвюх пляцоўках будуць працаваць пункты грамадскага харчавання і аб’екты рознічнага гандлю.

 

Платнымі будуць толькі два мерапрыемствы

Практычна ўсе навагоднія і калядныя мерапрыемствы, заяўленыя ў праграме, будуць бясплатнымі. Квіткі прадугледжаны толькі на два з іх. Гэта канцэрт «Каляды з капэлай» у гарадскім Цэнтры культуры і вольнага часу і традыцыйны калядны канцэрт дзіцячых школ мастацтваў Магілёва ў Палацы культуры вобласці. Арганізатары апошняга падрыхтавалі для жыхароў горада на Дняпры займальную музычную гісторыю пад назвай «Забавы ля каляднай ёлкі». Гледачоў чакаюць захапляльныя танцы, меладычныя песні і віртуозныя інструментальныя творы. У канцэрце прымуць удзел творчыя калектывы, лаўрэаты і стыпендыяты розных конкурсаў.

У фае ўстановы культуры таксама адбудзецца выстава дзіцячых творчых работ. Тут будуць прадстаўлены вырабы ў розных жанрах – жывапіс, акварэль, дэкаратыўна-прыкладное мастацтва.

 

ПРАГРАМА навагодніх і калядных мерапрыемстваў у Магілёве

 

Калі вы заўважылі памылку ў тэксце, калі ласка, вылучыце яе і націсніце Ctrl+Enter.

Чытайце таксама ў катэгорыі "навiна дня":

14.12.2018 - 16:59 | Прамую тэлефонную лінію правядзе 15 снежня старшыня Магілёўскага аблвыканкама Уладзімір Даманеўскі

Прамую тэлефонную лінію правядзе 15 снежня старшыня Магілёўскага аблвыканкама Уладзімір Віктаравіч Даманеўскі. З 9.00 да 12.00 па нумары (8 0222) 50-18-69 ён адкажа на пытанні жыхароў Прыдняпроўскага краю.

13.12.2018 - 09:23 | У Магілёве адкрылі першае ганаровае консульства Латвіі ў Беларусі

Ганаровае Консульства Латвійскай Рэспублікі па Магілёве і Магілёўскай вобласці адкрылі ў горадзе на Дняпры. Ва ўрачыстай цырымоніі прынялі ўдзел саветнік – намеснік пасла Латвіі ў Беларусі Даце Рутка, кіраўнік Дырэкцыі па эканамічных адносінах, гандлі і развіцці Міністэрства замежных спраў Латвіі Юрыс Шталмейстарс, старшыня Магілёўскага аблвыканкама Уладзімір Даманеўскі, старшыня Магілёўскага гарвыканкама Уладзімір Цумараў, перадае карэспандэнт сайта.

12.12.2018 - 10:46 | Больш за 30 праектаў прадставяць у Крычаве ўдзельнікі абласнога этапу рэспубліканскага моладзевага конкурсу «100 ідэй для Беларусі»

Больш за 30 праектаў прадставяць у Крычаве ўдзельнікі абласнога этапу рэспубліканскага моладзевага конкурсу «100 ідэй для Беларусі». Пра гэта карэспандэнту сайта паведамілі ў абкаме ГА «БРСМ».

11.12.2018 - 16:14 | У рэгіянальным адборы на конкурсы «Славянскага базару-2019» прынялі ўдзел 29 выканаўцаў з Магілёўскай вобласці

У Беларусі праходзіць першы этап адбору ўдзельнікаў Міжнароднага конкурсу выканаўцаў эстраднай песні «Віцебск-2019» і Міжнароднага дзіцячага музычнага конкурсу «Віцебск-2019». Старт быў дадзены 5 снежня ў Гродне, а сёння эстафету прымаў Магілёў. Праслухоўванне прэтэндэнтаў ад нашага рэгіёна адбылося ў абласным метадычным цэнтры культурна-народнай творчасці і асветнай працы, дзе працавала журы пад старшынствам заслужанай артысткі Рэспублікі Беларусь Алены Ланской.

07.12.2018 - 15:00 | Дабрачынны тэлемарафон «Нашы дзеці» пройдзе ў прамым эфіры на тэлеканале «Беларусь 4. Магілёў» 14 снежня

IV дабрачынны тэлемарафон «Нашы дзеці» пройдзе 14 снежня ў прамым эфіры тэлеканала «Беларусь 4. Магілёў» з 13:55 да 19:15. Ён праводзіцца ў межах абласнога дабрачыннага марафону «Сагрэем дзіцячыя сэрцы», які арганізуе абласное аддзяленне «Беларускага дзіцячага фонду».