Рус Бел Eng 中文

Цэнтр традыцыйнай кітайскай медыцыны адкрылі ў Магілёве

Цэнтр традыцыйнай кіта​йскай медыцыны адкрылі сёння на базе Магілёўскай цэнтральнай паліклінікі з удзелам дэлегацыі з горада-пабраціма Нанкіна (КНР).

Рэалізацыя праекта стала магчымай дзякуючы адпаведнаму пагадненню паміж Магілёвам і Нанкінам, падпісаным 27 верасня 2016 года. Дакумент прадугледжваў штогадовае накіраванне ў горад на Дняпры спецыялістаў у галіне кітайскай медыцыны для лячэння жыхароў сталіцы Прыдняпроўскага краю і перадачы наяўнага вопыту мясцовым урачам.

Для ажыццяўлення дамоўленасцяў у Магілёве зрабілі ўсё неабходнае – знайшлі памяшканні, зрабілі рамонт і ўстанавілі абсталяванне. На дадзены момант цэнтр займае два прасторныя кабінеты Цэнтра дагаворных медыцынскіх паслуг на трэцім паверсе паліклінікі. Тут усталяваны апарат лазернай тэрапіі – падарунак ад Магілёўскага абласнога ўпраўлення ААТ «ААБ Беларусбанк», кушэткі, апарат азонатэрапіі, кіслародны канцэнтратар, уладкаваны месцы для работы персаналу. Вялікая ўвага нададзена афармленню сцен, што надае памяшканням асаблівы каларыт.

У цэнтры маецца намер праводзіць працэдуры традыцыйнай кітайскай медыцыны, у тым ліку масаж, іглаўколванне і інш. Ён будзе цесна звязаны з усімі службамі паліклінікі і вырашаць задачы ва ўзаемадзеянні з імі. У дзень тут змогуць прымаць да 20 пацыентаў на платнай аснове.

Спектр праблем, з якімі змогуць звяртацца сюды магілёўцы і госці горада шырокі. Гэта і хранічныя галаўныя болі, усё, што звязана з хрыбтом, астэахандрозам, асабістыя праблемы, цукровы дыябет, праблемы страўнікава-кішачнага тракту. Ужо з панядзелка плануецца адкрыць запіс на кансультаванне для наступнага накіравання да кітайскіх спецыялістаў.

У цэнтры будуць вахтавым метадам працаваць 2-3 урачы з Паднябеснай. Акрамя таго, беларускія спецыялісты адправяцца на курсы ў КНР для навучання асновам традыцыйнай кітайскай медыцыны. Гэта прадугледжана пагадненнем аб супрацоўніцтве паміж Магілёўскай цэнтральнай паліклінікай і Нанкінскай бальніцай традыцыйнай кітайскай медыцыны, якое было падпісана сёння.

Падчас адкрыцця цэнтра старшыня Магілёўскага гарвыканкама Уладзімір Цумараў адзначыў, што літаральна на днях вярнуўся з Кітая, дзе ў яго была магчымасць пабываць у Нанкінскай бальніцы. Ён асабіста змог пераканацца: аказанне медыцынскай дапамогі тут знаходзіцца на высокім узроўні. «Упэўнены, што веды і вопыт кітайскіх спецыялістаў у сферы медыцыны будуць карысныя для нашых медыкаў і, аб’яднаўшы намаганні, мы зможам аказваць яшчэ больш якасныя паслугі па лячэнні нашых грамадзян», – падкрэсліў мэр.

У сваю чаргу начальнік камітэта па справах аховы здароўя Нанкіна Фан Чжуню падкрэсліў важнасць філасофіі, на якой будуецца традыцыйная кітайская медыцына – гэта адзінства прыроды і чалавека. «Спадзяюся, сумесны праект прынясе карысць абодвум бакам, а таксама паслужыць імпульсам для рэалізацыі ініцыятыў у іншых галінах», – сказаў госць.


 

Пры выкарыстанні матэрыялаў актыўная гіперспасылка на mogilev-region.gov.by абавязковая