Рус Бел Eng 中文

Ганаровае званне «Горад, дружалюбны да дзяцей» Магілёў можа атрымаць у 2018 годзе

Званне «Горад, дружалюбны да дзяцей» Магілёў можа атрымаць у 2018 годзе. Такая магчымасць абмяркоўвалася сёння падчас сустрэчы старшыні Магілёўскага аблвыканкама Уладзіміра Даманеўскага з прадстаўніком ЮНІСЭФ у Беларусі доктарам Рашэдам Мустафой Сарварам.

«У Магілёва добры патэнцыял, створана спрыяльнае асяроддзе для таго, каб забяспечыць рэалізацыю правоў дзяцей. Я ўпэўнены, што, аб’яднаўшы намаганні ўсіх зацікаўленых бакоў, абласны цэнтр ужо ў найбліжэйшы час можа атрымаць высокі статус горада, дружалюбнага дзецям», – падкрэсліў госць.

Ініцыятыва, якая зарадзілася ў Еўропе ў сярэдзіне 90-х гадоў XX стагоддзя, зараз падхоплена амаль 900 гарадамі свету, у тым ліку Лонданам, Мюнхенам, Масквой, Санкт-Пецярбургам, Вільнюсам. Беларусь уключылася ў рэалізацыю праекта ў 2006 годзе, і цяпер у ім прымаюць удзел 25 гарадоў Сінявокай, 10 з якіх ужо носяць ганаровае званне «Горад, дружалюбны да дзяцей».

Атрымаць аналагічны афіцыйны статус маюць намер у гэтым годзе і ў Магілёве. Горад на Дняпры яшчэ ў 2013 годзе далучыўся да ініцыятывы ЮНІСЕФ. Тут распрацаваны эфектыўныя напрамкі ўзаемадзеяння мясцовай улады з органамі дзіцячага і моладзевага самакіравання. У сістэме гэтых узаемаадносін паўстала такая мадэль самаарганізацыі і развіцця дзяцей і вучнёўскай моладзі, як парламент. Яго прадстаўнікі прымаюць удзел у пасяджэннях выканаўчых камітэтаў, сесій гарадскога Савета дэпутатаў, прэс-канферэнцыях з удзелам адміністрацыі горада. Юныя парламентарыі праз розныя акцыі вучацца быць карыснымі грамадству, бачыць праблемы, знаходзіць магчымасці для іх вырашэння.

Як заўважыла намеснік старшыні Магілёўскага гарвыканкама Ала Галушка, у 2017 годзе ў абласным цэнтры правялі маніторынг і ацэнку вынікаў дзейнасці па стварэнні мадэлі горада, дружалюбнага дзецям. На падставе дадзеных, атрыманых у ходзе даследаванняў, быў падрыхтаваны і накіраваны старшыні Дзіцячага Фонду ААН ЮНІСЕФ (прадстаўніцтва ў Беларусі) і ў Каардынацыйны савет па рэалізацыі ініцыятывы «Горад, дружалюбны да дзяцей» спецыяльны даклад для разгляду пытання аб прысваенні Магілёву ганаровага звання.

Абласны цэнтр варты быць горадам, дружалюбным да дзяцей, адзначыў Рашэд Мустафа Сарвар. Тут, як і ў цэлым па Магілёўскай вобласці, добрымі тэмпамі расце нараджальнасць, бюджэт сацыяльна арыентаваны, вынікова рэалізуецца праграма прафілактыкі дзіцячага траўматызму, фіксуецца нізкая смяротнасць дзяцей ад знешніх прычын. На карысць горада на Дняпры гаворыць і той факт, што Магілёў будзе насіць у 2018 годзе статус «Маладзёжная сталіца Беларусі».

У сваю чаргу Уладзімір Даманеўскі заўважыў, што супрацоўніцтва з такімі міжнароднымі арганізацыямі, як ЮНІСЕФ, надае рабоце на месцах асаблівую значнасць і дазваляе весці дзейнасць на аснове міжнародных тэндэнцый і перадавых практык як у ахове здароўя, так і адукацыі. Кіраўнік рэгіёна выказаў упэўненасць, што за час рэалізацыі ініцыятывы «Горад, дружалюбны да дзяцей» сабраны велізарны вопыт працы з дзецьмі і моладдзю па многіх напрамках. Было б карысным падзяліцца ім і ў дыскусійнай форме. Пляцоўкай для дыялогу можа стаць менавіта Магілёў.

Рашэд Мустафа Сарвар падтрымаў прапанову Уладзіміра Даманеўскага, падкрэсліўшы, што на ўзроўні Міністэрства адукацыі ўжо абмяркоўвалася магчымасць правядзення такой канферэнцыі. «Беларусь – адзіная краіна ў Еўропе і Цэнтральнай Азіі, дзе налічваецца самая вялікая колькасць гарадоў, якія ўдзельнічаюць у ініцыятыве і сертыфікуюцца, – сказаў госць. – Трэба як мага хутчэй вызначыцца з датай правядзення канферэнцыі, каб вырашыць усе ўмоўнасці, звязаныя з прысутнасцю на мерапрыемстве дыпламатычнага корпуса замежных дзяржаў».

Дарэчы, у Магілёўскай вобласці акрамя Магілёва глабальную ініцыятыву ЮНІСЕФ «Горад, дружалюбны да дзяцей» падтрымліваюць Шклоў, Касцюковічы, Горкі. У гэтых гарадах таксама рэалізуюцца праграмы і праекты, накіраваныя на памяншэнне негатыўнага ўплыву гарадскога асяроддзя на жыццё дзіця з выкарыстаннем тых магчымасцяў і пераваг, якія яна дае.

На думку Уладзіміра Даманеўскага, у рамках праекта асабліва важная праца па пераходзе ад інтэрнатных устаноў для дзяцей, якія па розных прычынах засталіся без бацькоў, да дамоў сямейнага тыпу. У Магілёўскай вобласці гэтая форма працы ідзе прагрэсіруючымі тэмпамі. За 9 гадоў перастала функцыянаваць 9 інтэрнатаў, а сёння ў рэгіёне адкрываецца 57-ы дзіцячы дом сямейнага тыпу. «Дзякуючы такім дамам, мы сыходзім ад абыякавага і агульнага падыходу да выхавання дзяцей, – падкрэсліў кіраўнік Прыдняпроўскага краю. – Паўнавартасная сям’я дае добрыя магчымасці для ўсебаковага развіцця».

У сваю чаргу Рашэд Мустафа Сарвар заўважыў, што ўладкаванне дзяцей у сям’і – адзін з галоўных напрамкаў, які падтрымлівае ЮНІСЕФ. Акрамя таго, ён выказаў прапанову аб павышэнні эфектыўнасці работы Беларусі па дасягненні Мэтаў устойлівага развіцця праз лакалізацыю дзейнасці ў Магілёве.

Падчас візіту ў рэгіён Рашэд Мустафа Сарвар наведаў Абласны цэнтр творчасці, дзе сустрэўся з прадстаўнікамі моладзевага парламента і прыняў удзел у абмеркаванні пытанняў арганізацыі і адкрыцця рэсурснага цэнтра моладзевых ініцыятыў. Таксама госць пабываў у абласным цэнтры карэкцыйна-развіваючага навучання і рэабілітацыі і папрысутнічаў на адкрыцці дзіцячага дома сямейнага тыпу ў в. Мікалаеўка Магілёўскага раёна.

 

Пры выкарыстанні матэрыялаў актыўная гіперспасылка на mogilev-region.gov.by абавязковая