Рус Бел Eng 中文

Медаль «За адвагу» праз 72 гады ўручылі ветэрану Вялікай Айчыннай вайны Максіму Застрэлаву

Ва УУС Магілёўскага аблвыканкама адбылося ўрачыстае ўручэнне медаля «За адвагу» ветэрану Вялікай Айчыннай вайны палкоўніку міліцыі ў адстаўцы Максіму Застрэлаву. Цырымонію правёў памочнік ваеннага аташэ пры пасольстве Расійскай Федэрацыі ў Рэспубліцы Беларусь маёр Ілья Мелітоўскі.

Яшчэ ў 1945 годзе ад імя Прэзідыума Вярхоўнага Савета СССР загадам па 1289-м Мазурскім стралковым палку 110-й Верхнедняпроўскай дывізіі 50 арміі №030/н ад 20 чэрвеня «За прыкладныя паводзіны ў баі з нямецкімі захопнікамі на подступах да горада Кёнігсберга, дзе ён з асабістай зброі, праяўляючы смеласць і мужнасць, знішчыў 2-х нямецкіх салдат» Максім Застрэлаў узнагароджаны медалём «За адвагу». Аднак па збегу абставін у той час ён не атрымаў заслужаны знак: у выніку памылкі на ўзнагародным лісце ў адзнацы аб ўручэнні ў 1950 годзе было напісана – «са слоў памёр». Праз больш за 70 гадоў, дзякуючы выпадку, медаль знайшоў героя.

Аднойчы сын зацікавіўся ўзнагародамі бацькі і стаў шукаць інфармацыю ў інтэрнэце. Так ён выйшаў на сайт «Подзвіг народа», дзе значылася, што Максім Застрэлаў мае не адзін медаль «За адвагу», а два: за затрыманне вялікай калоны немцаў у Мінску і за гераізм у баі з нямецкімі захопнікамі на подступах да горада Кёнігсберга.

Сваякі звярнуліся ў Магілёўскі гарадскі ваенкамат. Пачалася карпатлівая праца. Звязаліся з архівам Падольска. Там інфармацыя пра другі медаль знайшла сваё пацверджанне. Затым пачаўся працэс аднаўлення дакументаў. На сённяшні дзень маецца поўны іх камплект, які пацвярджае ўзнагароду.

Максім Застрэлаў нарадзіўся 24 сакавіка 1924 года ў вёсцы Пянькоўка Клімавіцкага раёна. У 1943-м быў прызваны ў рады Чырвонай Арміі. Служыў кулямётчыкам ў 1289 стралковым палку, у складзе якога вызваляў ад ворагаў родную Магілёўшчыну, Мінск.

Будучы пехацінцам, дайшоў да Кёнінгберга. Узнагароджаны ордэнам Вялікай Айчыннай вайны 2 ступені, медалямі: «За адвагу», «За перамогу над Германіяй у Вялікай Айчыннай вайне 1941-1945 гг.» І «За ўзяцце Кенінсгберга».

У 1948-м Максім Застрэлаў змяніў вайсковыя пагоны на міліцэйскія. Свой прафесійны шлях пачынаў пашпартыстам ў Магілёўскім РАМ МДБ ў 1948 годзе. У 1953-м скончыў Адэскую школу міліцыі і ў званні лейтэнанта быў прызначаны на пасаду старэйшага інструктара палітчасці УМ УМУС Магілёўскай вобласці, затым служыў старшым інспектарам пашпартна-рэгістрацыйнага аддзела УУС Магілёўскага аблвыканкама, старшым оперупаўнаважаным аддзела кадраў УАГП Магілёўскага аблвыканкама.

Завяршыў кар’еру на пасадзе начальніка спецкамендатуры №1 пры аддзеле ўнутраных спраў Кастрычніцкага райвыканкама Магілёва ў 1979 годзе. Скончыў вышэйшую школу МАГП РСФСР. Жанаты. Мае чацвярых дзяцей.

Фота - УУС Магілёўскага аблвыканкама

Пры выкарыстанні матэрыялаў актыўная гіперспасылка на mogilev-region.gov.by абавязковая