Рус Бел Eng 中文

Моладзь упрыгожвае фасады будынкаў Магілёва ўрыўкамі з вершаў беларускіх паэтаў

Маладыя мастакі пачалі ўпрыгожваць фасады будынкаў Магілёва ўрыўкамі з вершаў беларускіх паэтаў. Першыя радкі ўжо з’явіліся ў адным з двароў па праспекце Міра.

Верш беларускай савецкай паэткі Яўгеніі Янішчыц, дзякуючы магілёўскай мастачцы Юліі Раткінай, падарыў звычайнаму пейзажу кропельку рамантызму. Знаёмыя многім са школьнай пары словы «Ты пакліч мяне. Пазаві. Сто дарог за маімі плячыма. Пачынаецца ўсё з любві. А інакш і жыць немагчыма» сталі для прахожых напамінам пра каштоўнасць самага галоўнага пачуцця на свеце.

Ідэя належыць выпускнікам школы ініцыятыў “Цяпліца”, якая другі сезон дапамагае актыўным магілёўцам рэалізаваць цікавыя задумкі, накіраваныя на паляпшэнне гарадскога жыцця і асяроддзя. Функцыянуе незвычайная навучальная ўстанова пад крылом Цэнтра гарадскіх ініцыятыў Магілёва.

Як адзначыў кіраўнік цэнтра Юрый Стукалаў, на працягу месяца, дзякуючы маладым мастакам і падтрымцы выканаўчай улады, у дварах абласнога цэнтра з’явіцца яшчэ каля дзясятка ўрыўкаў з твораў сучасных аўтараў і класікаў беларускай літаратуры, у тым ліку Максіма Багдановіча, Янкі Купалы, Уладзіміра Караткевіча, Ларысы Геніюш. На прэзентацыю арт-аб’екта з радкамі з верша маладога паэта Віталя Рыжкова запросіць сам аўтар, які зараз жыве ў Мінску, але нарадзіўся і вучыўся ў Магілёве.

«Беларуская мова меладычная і непаўторная, а вершы, напоўненыя чуласцю, дабрынёй і любоўю да радзімы, імгненна раскрываюць усю яе прыгажосць. Спадзяёмся, што жыхары горада на Дняпры ацэняць нашу ініцыятыву, а аб’екты стануць дастойным упрыгожаннем абласнога цэнтра», – падкрэсліў Юрый Стукалаў.

 

Пры выкарыстанні матэрыялаў актыўная гіперспасылка на mogilev-region.gov.by абавязковая