Рус Бел Eng 中文

Ордэн Маці ўручылі чатырнаццаці шматдзетным жанчынам Магілёўскай вобласці

Урачысты прыём, прысвечаны Дню маці, адбыўся сёння ў Магілёўскім аблвыканкаме. У мерапрыемстве прынялі ўдзел 40 жанчын з гарадоў і раёнаў рэгіёна, якія ўзялі дзяцей пад апеку і папячыцельства і выхавалі дастойных сыноў і дачок.

Віншуючы тых, хто сабраўся, а ў іх асобе ўсіх жанчын Прыдняпроўскага краю, Уладзімір Даманеўскі адзначыў, што дзяржава робіць усё неабходнае для абароны мацярынства і дзяцінства. «Прэстыж сям’і ў Беларусі знаходзіцца на высокім узроўні, але мы павінны рабіць усё, каб ён быў яшчэ вышэй. Таму што самую галоўную ролю ў выхаванні і станаўленні чалавека іграе сям’я і, у першую чаргу, маці. Наколькі ў сям’і будуць правільна выбудаваны прыярытэты (да чаго ставіцца з павагай, што шанаваць і любіць), настолькі чалавек будзе падрыхтаваны ўступіць у самастойнае жыццё», – лічыць губернатар.

Кіраўнік рэгіёна падзякаваў жанчынам за вялікую матчыну любоў і пажадаў расці іх дзецям годнымі грамадзянамі краіны. «Хай ваша самааддача, цярпенне і праца ўшануецца шчырай удзячнасцю і павагай дзяцей і грамадства. Хай дочкі і сыны цалкам апраўдаюць вашы надзеі і мары», – падкрэсліў Уладзімір Даманеўскі.

Кіраўнік вобласці ўручыў ордэн Маці 14 жанчынам, якія нарадзілі і выхавалі пяцёра і больш дзяцей. Сярод іх – швачка ТАА «Формэль» (Глускі раён) Ірына Вігурах, машыніст кацельні магілёўскага прадпрыемства «Жылкамгас» Ірына Карніловіч, хатнія гаспадыні Любоў Міклашэвіч (Быхаўскі раён), Наталля Баркунова (Магілёў), Галіна Арлоўская (Магілёўскі раён). Усяго ў рэгіёне ордэнам Маці ўзнагароджаны 882 жанчыны.

У сваім выступленні маці пяцярых дзяцей, галоўны бухгалтар цэнтралізаванай бухгалтэрыі аддзела адукацыі, спорту і турызму Бялыніцкага райвыканкама Алена Асіпёнак адзначыла, што гэта знакавая і важная ў яе жыцці падзея, яна яшчэ раз пацвярджае дзяржаўнае і грамадскае прызнанне мацярынства. «Прыемна, што наш выбар на карысць вялікай і моцнай сям’і знайшоў разуменне і дастойную ацэнку з боку дзяржавы, – сказала яна. – Упэўнена, што ўзнагароды, якімі адзначаны маці, натхняць нас на вялікія подзвігі ў справе выхавання дзяцей. Бо быць маці – гэта не толькі вялікае шчасце, гэта яшчэ і вялікая адказнасць».

У гонар віноўніц свята быў дадзены канцэрт, у якім юныя артысты спявалі пра іх цяпло, клопат, ласку, увагу і самаадданасць. Усім удзельніцам сустрэчы ўручылі кветкі.

Урачысты прыём у аблвыканкаме адбыўся ў межах Тыдня маці, падчас якога праходзілі сустрэчы кіраўнікоў прадпрыемстваў і арганізацый, старшыняў прафсаюзных камітэтаў, дэпутатаў з маці, канферэнцыі, семінары, лекцыі, бясплатныя кансультацыі па пытаннях здароўя маці і дзіцяці ў медыцынскіх установах, сямейна-шлюбных адносін, выхавання дзяцей, сацыяльных ільготаў і гарантый, прававых праблемах. На гэтым тыдні працаўнікі сацыяльных службаў таксама наведвалі на хаце жанчын – ветэранаў вайны і працы.

Ва ўстановах адукацыі, культуры, спорту і турызму, тэрытарыяльных цэнтрах сацабслугоўвання насельніцтва арганізоўваліся дзіцячыя ранішнікі, канцэртныя праграмы, тэматычныя вечары, святочныя пасяджэнні сямейных клубаў, кніжныя экспазіцыі і выставы сямейнай творчасці, раённыя спартакіяды сярод сямейных каманд і іншыя мерапрыемствы.

Акрамя таго, ва ўсіх гарадах і раёнах вобласці ў гэтыя дні ўшаноўвалі заслужаных маці-працаўніц, удзельніц Вялікай Айчыннай вайны, маці воінаў-інтэрнацыяналістаў, удоў загінулых пры выкананні службовага абавязку супрацоўнікаў праваахоўных органаў, шматдзетных маці.

Пры выкарыстанні матэрыялаў актыўная гіперспасылка на mogilev-region.gov.by абавязковая