Рус Бел Eng 中文

Праваслаўныя адзначаюць Дзень памяці святых апосталаў Пятра і Паўла

Праваслаўныя вернікі сёння адзначаюць Дзень памяці святых Першавярхоўных апосталаў Пятра і Паўла.

Згодна з пісаннем, святы Пётр (першапачатковае імя Сымон) і яго брат Андрэй былі простымі рыбакамі. Менавіта за лоўляй рыбы сустрэў іх Ісус і паклікаў ісці за сабой, каб зрабіць іх «лаўцамі людзей». Пётр першым паверыў, што Ісус – сын Божы, і тады Збаўца назваў яго за цвёрдае вызнанне веры Кіфаю (каменем, па-грэчаску – Пятром).

Апостал Пётр быў адным з трох найбліжэйшых вучняў Хрыста, аднак у самы рашучы момант жыцця Ісуса Пётр адрокся ад яго. Раскаяўшыся ў зробленым, ён атрымаў прабачэнне ад уваскрэслага Хрыста. Пасля Пётр сваёй дзейнасцю аказаў велізарны ўплыў на лёс хрысціянства. Пропаведзь яго заўсёды была моцная і пераканаўчая. Шмат цудаў тварыў апостал у імя Госпада. Аднойчы ў Ерусаліме Пётр сустрэў кульгавага жабрака, які прасіў міласціну. Пётр сказаў яму: «Срэбра і золата няма ў мяне, а што маю – даю табе: у імя Ісуса устань і хадзі». Хворы адразу ж выздаравеў і ўстаў на ногі.

Апостал Павел (першапачатковае імя Саул) паходзіў з сям’і фарысеяў і спачатку быў ворагам хрысціянства. Аднак сустрэча з Ісусам цалкам перавярнула яго жыццё. З лютага ганіцеля хрысціян ён ператварыўся ў вялікага прапаведніка хрысціянскіх ідэй. Пасля Уваскрасення Хрыста Павел прысвяціў сваё жыццё распаўсюджванню і прапаведаванню хрысціянскага Евангелля. Апостал падарожнічаў па Малой Азіі і Грэцыі, пераходзячы з горада ў горад, падвяргаючыся незлічоным небяспекам і ганенням. Ён здзейсніў пяць вялікіх падарожжаў па ўсім Міжземнамор’і і больш за ўсіх апосталаў папрацаваў у справе пропаведзі. Павел напісаў 14 пасланняў, якія сістэматызавалі Хрыстова вучэнне.

Святыя апосталы Пётр і Павел былі пакараны смерцю ў Рыме падчас праўлення імператара Нерона каля 65 года. Пётр быў укрыжаваны ўніз галавой. Ён сам папрасіў аб гэтым, бо не лічыў сябе годным памерці гэтаксама, як Хрыстос. Павел перанёс шмат пакут і, як рымскі грамадзянін, быў не ўкрыжаваны, а абезгалоўлены.

Дзень святых апосталаў Пятра і Паўла завяршае гадовы Пятроў пост. Свята апосталаў лічыцца святам сонца. Нашы продкі верылі, што ў гэты дзень рана раніцай гуляе сонца, і стараліся самі ўбачыць гэту з’яву.

 

БЕЛТА
 

При использовании материалов активная гиперссылка на mogilev-region.gov.by обязательна