Фрэзероўшчык ААТ «Магілёўліфтмаш» Васіль Дзівакоў стаў лепшым на рэспубліканскім конкурсе прафесійнага майстэрства «Беларускі майстар – 2017», фінал якога прайшоў на базе ААТ «БелАЗ».

У конкурсе, арганізаваным Федэрацыяй прафсаюзаў Беларусі, прынялі ўдзел 26 майстроў сваёй справы з усёй краіны – пераможцаў аналагічных абласных этапаў. Кожнаму з іх трэба было прайсці два этапы – практычны і тэарэтычны, дзе і паказаць свой прафесійны ўзровень.

Выпрабаванні доўжыліся каля дзвюх гадзін: 40 хвілін адводзілася для адказу на тэарэтычныя пытанні і адна гадзіна – на фрэзероўку падрыхтаванай дэталі па зададзеных чарцяжах. Дарэчы, за кожную сэканомленую хвіліну практычнага задання ўдзельнікі атрымлівалі па 5 дадатковых балаў, за кожныя выкарыстаныя звыш устаноўленай нормы 60 секунд – гублялі столькі ж.

Па выніках працоўнага спаборніцтва магіляўчанін быў удастоены дыплома Першай ступені і звання «Беларускі майстар – 2017». Другі вынік паказаў работнік ААТ «БелАЗ» Сяргей Паўленка, трэці – фрэзероўшчык ААТ «Візас» з Віцебска Ігар Царагародцаў.

Узнагароджанне пераможцаў адбудзецца 1 мая падчас гала-канцэрта прафсаюзнага конкурсу творчасці працоўных калектываў «Новыя імёны Беларусі».