Рус Бел Eng 中文

Рэспубліканская акцыя «Бяспека – у кожны дом!» пройдзе ў Магілёўскай вобласці з 1 па 28 лютага

Рэспубліканская акцыя «Бяспека – у кожны дом!» пройдзе ў рэгіёне з 1 па 28 лютага. Пра гэта паведаміла старшы інспектар цэнтра бяспекі жыццядзейнасці і ўзаемадзеяння з грамадскасцю Магілёўскага абласнога ўпраўлення МНС Вольга Нехарошых.

«У 2017 годзе ў рэгіёне зарэгістравана 705 пажараў, якія забралі жыцці 67 чалавек, у тым ліку 1 дзіця, – адзначыла суразмоўца. – Вогненная статыстыка адкрыта ўжо і ў гэтым годзе: адбылося 66 пажараў, загінулі 4 чалавекі. І аснова сумнай статыстыкі – не ваенныя дзеянні, стыхійныя з’явы, а чалавечая бестурботнасць і халатнасць ў адносінах да пытанняў бяспекі».

Прычыны надзвычайных сітуацый банальныя: неасцярожнае абыходжанне з агнём, парушэнне правілаў эксплуатацыі пячнога ацяплення і электраабсталявання, дзіцячае свавольства. З мэтай папярэджання пажараў і гібелі людзей у рэспубліцы аб’яўлена спецыяльная акцыя, якая ў Магілёўскай вобласці будзе складацца з чатырох этапаў.

З 1 па 9 лютага прафілактычныя гутаркі, дэманстрацыя відэафільмаў, віктарыны па АБЖ, канцэртныя праграмы з абавязковым уручэннем навучальнай наглядна-выяўленчай прадукцыі пройдуць у аддзяленнях дзённага знаходжання на базе тэрытарыяльных цэнтраў сацыяльнага абслугоўвання насельніцтва. Прыярытэт будзе аддадзены навучанню пажылых людзей, адзінокіх грамадзян правільным дзеянням у выпадку ўзнікнення надзвычайнай сітуацыі.

З 12 по 20 лютага эстафету бяспекі падхопяць ВНУ, ССНУ, ліцэі, каледжы. Праграма адаптаваная для аўдыторыі і дынамічная: тэматычныя гульнявыя праграмы і дыскатэкі, ток-шоу, прафілактычныя гутаркі і адпрацоўка планаў эвакуацыі ў выпадку пажараў і НС. Мерапрыемствы адбудуцца як на базе навучальных устаноў, так і ў інтэрнатах.

З 21 па 27 лютага акцыя пройдзе ў санаторыях, на прадпрыемствах, у арганізацыях. Прадстаўнікі МНС, а таксама актывісты БМГАВП, работнікі ўстаноў культуры правядуць лекцыі, тэматычныя конкурсы і віктарыны, дэманстрацыю фільмаў і ролікаў па тэматыцы АБЖ, канцэртныя праграмы.

Фінальны этап праекту запланаваны на 28 лютага. Усіх жадаючых будуць чакаць на адкрытых пляцоўках – у буйных гандлёвых і забаўляльных цэнтрах, рынках. Ратавальнікі арганізуюць конкурсы і віктарыны на самае лепшае веданне асноў бяспечнага правядзення, будуць навучаць правільным паводзінам малых і дарослых.

 

Пры выкарыстанні матэрыялаў актыўная гіперспасылка на mogilev-region.gov.by абавязковая