Рус Бел Eng 中文

Серыйны выпуск танк-кантэйнераў для вадкіх грузаў наладзілі ў Асіповічах

ЗАТ «Асіповіцкі завод транспартнага машынабудавання» пачало серыйны выпуск танк-кантэйнераў тыпу Е11-254, прызначаных для бяспечнай транспарціроўкі і часовага захоўвання вадкіх бяспечных і небяспечных грузаў. Пра гэта паведаміў дырэктар прадпрыемства Дзяніс Бабіна.

На прадукцыю атрымана дэкларацыя аб адпаведнасці патрабаванням тэхнічных рэгламентаў Мытнага саюза і сертыфікат Расійскага марскога рэгістра суднаходства. Першыя танк-кантэйнеры набывае Беларуская чыгунка, ёсць дамоўленасці на пастаўку ў Расію і Польшчу. Вядуцца работы па падрыхтоўцы серыйнай вытворчасці танк-кантэйнераў для перавозкі звадкаванага хлору, звадкаваных вуглевадародных газаў, для агрэсіўных хімічных вадкасцяў і з катлом з нержавейнай сталі для дыметылавага эфіру.

На прадпрыемстве завяршаецца падрыхтоўка да выпуску доўгіх вагонаў-платформаў, прызначаных для перавозкі буйнатанажных кантэйнераў па чыгунках каляіны 1 520 мм. У перспектыве плануецца іх выкарыстанне для транспарціроўкі грузаў у межах эканамічнага пояса Шаўковага шляху.

«Мы плануем да канца года выпусціць каля 100 адзінак асноўнай прадукцыі, а ў 2018-м нарасціць гэтыя аб’ёмы прыкладна ў 9 разоў – 500 вагонаў-платформаў і 400 танк-кантэйнераў і такім чынам выйсці на прыбытковую працу. У планах на 2019 г. – выхад на праектныя магутнасці і выпуск да 5 300 адзінак асноўнай прадукцыі ў год. Для гэтага мы актыўна працуем з партнёрамі ў Беларусі, Расіі, Украіны, прапрацоўваюцца пастаўкі прадукцыі ў краіны ЕС і іншыя дзяржавы», – сказаў дырэктар.

Паводле яго слоў, прадукцыя прадпрыемства канкурэнтаздольная на рынку, яна адрозніваецца высокай якасцю і надзейнасцю ў эксплуатацыі, паколькі вытворчасць вядзецца на цалкам аўтаматызаваным абсталяванні. ЗАТ таксама аказвае паслугі па правядзенні статычных выпрабаванняў, рамонце танк-кантэйнераў і сухагрузных кантэйнераў, па тэрма- і металаапрацоўцы, плазменнай рэзцы металапракату, зварцы і інш.

Асноўнымі спажыўцамі прадукцыі завода з’яўляюцца кампаніі, якія займаюцца перавозкамі грузаў, прадпрыемствы нафтахімічнага комплексу і іншых галін народнай гаспадаркі, якія зацікаўлены ў набыцці грузавых вагонаў і кантэйнераў-цыстэрнаў, перш за ўсё ў краінах постсавецкай прасторы.

ЗАТ «Асіповіцкі завод транспартнага машынабудавання» створана 28 снежня 2016 года. Заснавальнікам з’яўляецца Магілёўскае аддзяленне Беларускай чыгункі. Тут працуюць каля 200 чалавек.

БЕЛТА

При использовании материалов активная гиперссылка на mogilev-region.gov.by обязательна