У Магілёўскай вобласці ўвядуць паніжальныя каэфіцыенты платы за карыстанне інтэрнатамі. Ён будзе роўны 0,2. Так вырашыў аблвыканкам. Аднак рашэнне яшчэ не ўступіла ў законную сілу.

Раней плата за карыстанне жылым памяшканнем у добраўпарадкаваным блоку ў Магілёве і Бабруйску складала каля Br70, у раённых гарадах – каля Br50, а ў сельскай мясцовасці – арыенціровачна Br20. З увядзеннем паніжальнага каэфіцыента плата за карыстанне паменшыцца да 4 раз, паведамілі ва ўпраўленні ЖКГ Магілёўскага аблвыканкама.

Паніжальны каэфіцыент будзе дзейнічаць на тэрыторыі ўсёй вобласці і незалежна ад ведамаснай падпарадкаванасці інтэрнатаў.

У тым, што кошт пражывання ў інтэрнатах знізіцца, ёсць і заслуга прафсаюзаў.

Рашэнне, прынятае аблвыканкамам, накіруюць ў Мінюст на экспертызу. Новаўвядзенне ўступіць у сілу пасля афіцыйнага апублікавання на Нацыянальным прававым інтэрнэт-партале.

Пасля таго як у Магілёўскай вобласці пачнуць дзейнічаць паніжальныя каэфіцыенты, у інтэрнатах жыроўкі стануць «лягчэйшымі». Але і грашовых паступленняў на абнаўленне інтэрнатаў будзе паступаць менш. У ЖКГ абяцаюць, што гэта не адменіць планаў па прывядзенні ў парадак агульнага жылля.

ТРК «Магілёў»