Рус Бел Eng 中文

У Магілёўскай вобласці ў 2018 годзе прышчэпкамі супраць грыпу плануецца ахапіць больш за 40% жыхароў рэгіёна

У Магілёўскай вобласці ў 2018 годзе прышчэпкамі супраць грыпу плануецца ахапіць 419 503 чалавекі, што складае больш за 40% жыхароў рэгіёна. Пра гэта паведаміла галоўны дзяржаўны санітарны ўрач вобласці Святлана Нячай.

За кошт мясцовых бюджэтаў і асабістых сродкаў грамадзян плануецца вакцынаваць – 19% грамадзян, за кошт уласных сродкаў прадпрыемстваў і арганізацый – 8%. Працоўнае насельніцтва рэгіёна плануецца прышчапіць за кошт усіх бюджэтаў на 52%.

Святлана Нячай адзначыла, што падрыхтоўчая праца арганізацый і прадпрыемстваў да кампаніі імунізацыі супраць грыпу восенню 2018 года падыходзіць да завяршэння.

«Сёння ўжо не падлягае сумневу, што эфектыўная барацьба з грыпам магчыма толькі шляхам масавай вакцынапрафілактыкі, якая дазволіць стварыць больш высокую імунную праслойку насельніцтва, – падкрэсліла галоўны дзяржаўны санітарны ўрач вобласці. – Мінулы эпідсезон паказаў, што захворванне на ВРІ і грып сярод працоўных прышчэпленых было меншым, чым сярод непрышчэпленых, у 9 разоў. Праведзеная вакцынацыя дазволіла прадухіліць больш за 400 тысяч выпадкаў грыпу і ВРВІ, у тым ліку 154 тыс. – сярод працоўнага насельніцтва. Эканамічны эфект прымянення супрацьгрыпозных вакцын у 84 разы перавышаў выдаткі на вакцынацыю».

Таксама суразмоўніца патлумачыла, што мэта вакцынацыі – не поўная ліквідацыя грыпу як інфекцыі, а зніжэнне захворвання, асабліва ад яго ўскладненняў, абвастрэння і ўскладненняў сардэчна-сасудзістых, лёгачных захворванняў і іншай хранічнай паталогіі.

Лепш за ўсё прышчэплівацца ад грыпу восенню: у кастрычніку-лістападзе, да пачатку сезоннага ўздыму захворвання на грып і ВРВІ, канстатавала Святлана Нячай. На працягу наступных 2-3 тыдняў сфарміруюцца антыцелы, якія забяспечваюць абарону на 6-12 месяцаў, затым разбураюцца. «У 2018 годзе для імунізацыі супраць грыпу будзе выкарыстоўвацца расійская вакцына «Грыпол плюс», французская «Ваксігрып» і вырабленая ў Нідэрландах «Інфлювак». У вобласць вакцыны паступяць у сярэдзіне верасня, – падкрэсліла яна. – Усе супрацьгрыпозныя лекі, якія прымяняюцца ў Магілёўскай вобласці, зарэгістраваны Міністэрствам аховы здароўя Беларусі, маюць вопыт прымянення не толькі ў нашай краіне, але і за мяжой».

Наколькі надзейная абарона выпрацуецца пасля вакцынацыі, залежыць ад многіх фактараў, у тым ліку ад узросту і стану здароўя пацыента, індывідуальных асаблівасцяў і г. д. Але ў сярэднім са 100 прышчэпленых 70-98 чалавек не захварэюць на грып. Калі ўсё ж прышчэплены чалавек і захварэе, то ўсё будзе працякаць у лёгкай форме і без ускладненняў.

Увядзенне ў арганізм вакцыны не можа выклікаць захворванне, але шляхам выпрацоўкі ахоўных антыцелаў стымулюе імунную сістэму для барацьбы з інфекцыяй. Акрамя таго, прышчэпка ад грыпу дазваляе атрымаць яшчэ і крыжаваны імунітэт ад іншых вострых рэспіраторных інфекцый.

Вірусы грыпу мутуюць з года ў год, таму неабходна штогадовая вакцынацыя супраць грыпу, каб прадухіліць хваробу. «Два з трох варыянтаў вірусаў грыпу, якія ўваходзяць у склад вакцыны ў 2018 годзе новыя, – падкрэсліла Святлана Нячай. – Гэта азначае, што ў эпідэмічным сезоне 2018-2019 года будзе цыркуляваць два невядомыя нашай імуннай сістэме вірусы грыпу. І гэта яшчэ адзін аргумент на карысць вакцынацыі. Мы можам з дапамогай вакцыны «пазнаёміць» і «падрыхтаваць» да сустрэчы наш арганізм з гэтымі новымі варыянтамі віруса грыпу».

Супрацьпаказанняў да вакцынацыі ад грыпу нямнога. Прышчэпку нельга рабіць пры вострых ліхаманкавых станах, у перыяд абвастрэння хранічных захворванняў, пры павышанай адчувальнасці арганізма да яечнага бялка (калі ён уваходзіць у склад вакцыны).

 

Даведачна:

Дзе можна зрабіць прафілактычную прышчэпку супраць грыпу?

Бясплатна:

– у тэрытарыяльнай паліклініцы пры наяўнасці паказанняў;

– за кошт сродкаў, выдзеленых наймальнікам для вакцынацыі сваіх работнікаў, на здраўпункце прадпрыемства;

Платна:

– у любой паліклініцы, пасля заключэння дагавора на платныя паслугі.

Хто можа атрымаць прафілактычныя прышчэпкі супраць грыпу бясплатна?

У адпаведнасці з Нацыянальным календаром прафілактычных прышчэпак бясплатнае правядзенне прышчэпак супраць грыпу прадугледжана ў наступных групах:

– дзецям ва ўзросце ад 6 месяцаў да 3 гадоў;

– дзецям ва ўзросце ад 3 гадоў і дарослым з хранічнымі захворваннямі;

– школьнікам;

– асобам з імунасупрэсіяй;

– асобам, старэйшым за 65 гадоў;

– цяжарным;

– медыцынскім работнікам;

– дзецям і дарослым, якія знаходзяцца ва ўстановах з кругласутачным рэжымам знаходжання;

– работнікам дзяржаўных органаў, якія арганізуюць бяспеку дзяржавы і жыццядзейнасці насельніцтва.

 

Пры выкарыстанні матэрыялаў актыўная гіперспасылка на mogilev-region.gov.by абавязковая