Рус Бел Eng 中文

У рэспубліканскім фінале конкурсу «100 ідэй для Беларусі» прыме ўдзел 11 праектаў ад Магілёўскай вобласці

У рэспубліканскім фінале конкурсу «100 ідэй для Беларусі», які пройдзе ў канцы сакавіка ў Мінску, прымуць удзел 11 праектаў ад Магілёўскай вобласці, паведамляе карэспандэнт сайта.

Рэгіянальны этап спаборніцтва праходзіў 10 студзеня на базе Магілёўскай абласной бібліятэкі імя У. І. Леніна. Моладзь Прыдняпроўскага краю на выставачнай экспазіцыі «Нашы ідэі табе, Магілёўшчына» прадставіла 35 інавацыйных праектаў, 11 з якіх, на думку абласнога экспертнага савета, аказаліся найбольш цікавымі. Сярод найлепшых – «Змена таксічнасці актыўнага глею і ўжыванне яго ў гаспадарцы», «Суперважаты», «Мабільны дадатак «Wild Беларусь», «Чат-bot Belgor TransBot», «Распрацоўка аналізатара для кантролю якасці вады», «Беларуская авоська», «Адлюстраванне праблем сучаснага грамадства ў вонкавай сацыяльнай рэкламе», «Стварэнне прылады для каларыметрычных даследаванняў», «Новы матэрыял для барацьбы з аблядненнем», «SOS, або 7 хвілін, якія могуць выратаваць жыццё», «Ткацтва на дошчачках». Дадзеныя перспектыўныя праекты атрымалі пуцёўкі ў фінал рэспубліканскага конкурсу, а аўтары найлепшых праектаў – сертыфікаты ўдзельнікаў конкурсу і прызы.

«100 ідэй для Беларусі» – гэта не проста назва наватарскага конкурсу. Гэта брэнд нашай краіны, сведчанне таго, што ў моладзі мноства цікавых распрацовак, якія здольны зрабіць наш свет лепшым. Характэрна, што гэтыя ідэі закранаюць розныя сферы жыццядзейнасці, – адзначыў першы сакратар Магілёўскага абкама ГА «БРСМ» Павел Алекса. – За гады існавання праекта колькасць ініцыятыў ужо даўно перасягнула сотую мяжу. Сёння ў рэгіянальнай скарбонцы іх налічваецца каля 250. Ёсць прыклады распрацовак, якія паспяхова рэалізуюцца на Магілёўшчыне. Напрыклад, праект «Сістэма камп’ютарнага кіравання асвятленнем спартыўных аб’ектаў», які дазваляе дамагчыся максімальнай эканоміі электраэнергіі, захоўваючы пры гэтым аптымальны ўзровень асветленасці, выкарыстоўваецца ў горадзе на Дняпры».

Па словах Паўла Алексы, нямала праектаў прайшло апрабацыю і даказала сваю эфектыўнасць. «Прыемна, што рэгіянальны архіў пастаянна папаўняецца ўнікальнымі ініцыятывамі. Гэта даказвае, што маладыя людзі могуць думаць рацыянальна, рэалізоўваць сябе», – падкрэсліў ён.

Сёння ў скарбонку трапіла яшчэ 11 распрацовак. Усе яны па-свойму цікавыя і заслугоўваюць увагі. Так, дзевяцікласнік Глускай гімназіі Дзмітрый Трыбуш у праекце «Змена таксічнасці актыўнага глею і ўжыванне яго ў гаспадарцы» даказаў, што актыўны глей можна выкарыстоўваць як угнаенне і ў якасці альтэрнатыўнага паліва. Навучэнец 10 класа СШ №18 Магілёва Данііл Шаройкін дзякуючы аналізатару для кантролю якасці вады за некалькі секунд можа праверыць пробу на ўтрыманне прымешак. Выхавальнік групы падоўжанага дня Дрыбінскай сярэдняй школы Дар’я Акінчыц у праекце «Ткацтва на дошчачках» зацікавіла тэхнікай пляцення паясоў. Як прызналася дзяўчына, упершыню пазнаёміўшыся з рамяством, яна не змагла спыніцца. Сёння ўмеліца не толькі працягвае развівацца ў абраным кірунку, але і навучае працаёмкай справе дзяцей.

На жаль, не ўсе праекты выйшлі ў фінал. Але не варта хвалявацца, сказаў Павел Алекса. «Сёння канкурсантам пашчасціла пагутарыць з прафесіяналамі ў розных сферах і атрымаць рэкамендацыі па ўдасканаленні і прасоўванні распрацовак. Упэўнены, да наступнага года некаторыя ліквідуюць недахопы і прадставяць больш якасныя прадукты, а некаторыя перагледзяць пад іншым вуглом свае задумкі. І хай вам у гэтым годзе не атрымалася пераадолець маленькую прыступку на шляху да дасягнення вызначанай мэты. Памятаеце, дарогу здужае той, хто ідзе», – падкрэсліў ён.

Займальны праект прывезлі навучэнцы 8-10 класаў ДУА «Курманаўскі вучэбна-педагагічны комплекс дзіцячы сад-сярэдняя школа» Мсціслаўскага раёна. Пад кіраўніцтвам Уладзіміра Страхі яны прадставілі працу «Лабрадор рэтрывер – чатырохногі сябар на службе ў Айчыны». Падчас прэзентацыі дзеці пастараліся даказаць, што гэта парода сабак валодае лячэбнымі якасцямі нароўні з такімі жывёламі, як коні і дэльфіны, а таксама здольная распазнаваць рак у чалавека на пачатковай стадыі.

Выхаванцы Бабруйскага дзяржаўнага гандлёва-эканамічнага прафесійна-тэхнічнага каледжа ў сваім праекце зрабілі стаўку на развіццё мясцовага брэнда. Хлопцы прадставілі эка-рэстаран «Бабровая хатка» і паспрабавалі падтрымаць моду на смачную і карысную ежу.

Яшчэ адна бабруйская дэлегацыя – дзяржаўны машынабудаўнічы прафесійна-тэхнічны каледж – прывезла цэлых тры праекты. Прычым усе яны, як сцвярджаюць «кулібіны», могуць знайсці рэальнае прымяненне. Напрыклад, «МотаКонь», ці, як яго ў сваім коле называюць вынаходнікі, «МотаМаруся», зробіць мабільнымі жыхароў аддаленых вёсак. Жалезны конь, які ў разабраным выглядзе змяшчаецца ў стары дарожны чамадан, збіраецца за 40 хвілін і развівае нядрэнную хуткасць. Іншы праект спатрэбіцца супрацоўнікам лясгасаў. На электрасамакатах яны могуць аб’язджаць свае ўчасткі, а завалы з дрэў расчышчаць з дапамогай бензапілы. Апошняя выкарыстоўваецца ў наватарскай тэхніцы ў якасці матора і, пры няхітрых маніпуляцыях, зможа служыць па прызначэнні.

Навучэнец 11 класа Забродскай сярэдняй школы Шклоўскага раёна Алег Варанкоў расказаў пра «Узаемадзеянні мікраарганізмаў каранёвых асацыяцый сідэратных раслін і бактэрыяльных угнаенняў». Малады чалавек верыць, што гэта можа стаць будучым у развіцці арганічнай сельскай гаспадаркі. Хлопец ужо правёў даследчыя работы на сваім участку і запэўнівае, што вынікі ўражваюць. Дарэчы, у будучыні Алег Варанкоў бачыць сябе старшынёй калгаса, дзе ён мае намер займацца экалагічным земляробствам.

Конкурс «100 ідэй для Беларусі» праводзіцца БРСМ з 2011 года. Праект рэалізуецца з мэтай актывізацыі інавацыйнага мыслення моладзі, прыцягнення яе да вырашэння задач сацыяльна-эканамічнага развіцця краіны.

Калі вы заўважылі памылку ў тэксце, калі ласка, вылучыце яе і націсніце Ctrl+Enter.

Чытайце таксама ў катэгорыі "моладзь":

13.12.2018 - 12:29 | Абласны калядны кадэцкі баль пройдзе 17 снежня ў Магілёве

Абласны калядны кадэцкі баль пройдзе 17 снежня ў Магілёве. Пра гэта карэспандэнту сайта паведамілі ў галоўным упраўленні па адукацыі аблвыканкама. 

10.12.2018 - 15:25 | Больш за 1,5 тыс. сувеніраў вырабяць да Новага года ў Магілёўскім эканамічным прафесійна-тэхнічным каледжы

Больш за 1,5 тыс. сувеніраў вырабяць да Новага года навучэнцы асаблівасцямі псіхафізічнага развіцця ў Магілёўскім дзяржаўным эканамічным прафесійна-тэхнічным каледжа. Пра гэта паведаміў дырэктар установы адукацыі Алег Бахановіч.

06.12.2018 - 09:31 | Прадстаўнікі Магілёўскай вобласці – у ліку найлепшых валанцёраў краіны

Пераможцаў рэспубліканскага конкурсу «Валанцёр года – Добрае сэрца» назвалі ў Мінску. Спаборніцтва праходзіла ў тры этапы (раённы, абласны, рэспубліканскі) і аб’яднала сотні добраахвотнікаў па ўсёй краіне.

30.11.2018 - 10:14 | Мультымедыйны праект бабруйчаніна заняў другое месца ў рэспубліканскім конкурсе «ПАТРИОТ.by»

У Рэспубліканскім цэнтры інавацыйнай і тэхнічнай творчасці падвялі вынікі конкурсу камп’ютарных распрацовак патрыятычнай накіраванасці «ПАТРИОТ.by». На гэты раз ён быў прысвечаны Году малой радзімы і аб’яднаў больш за паўсотні школьнікаў з усёй Беларусі, паведаміла загадчык аддзела па асноўнай дзейнасці тэхнічнай творчасці ДУА «Цэнтр творчасці дзяцей і моладзі г.Бабруйска» Таццяна Кізатава.

29.11.2018 - 13:59 | Сярэдняя школа №33 Магілёва – у ліку пераможцаў экаконкурсу «Героям спяваць лёгка»

Журы Рэспубліканскага экалагічнага конкурсу «Героям спяваць лёгка» выбрала найлепшыя відэаролікі аб асобным зборы смецця і аб’явіла пераможцаў.