Рус Бел Eng 中文

За апошнія пяць гадоў у Магілёўскай вобласці адкрыта 39 дзяржаўных аптэк

За апошнія пяць гадоў у Магілёўскай вобласці адкрыта 39 дзяржаўных аптэк. Пра гэта паведаміла першы намеснік генеральнага дырэктара Магілёўскага гандлёва-вытворчага рэспубліканскага ўнітарнага прадпрыемства «Фармацыя» Алена Раманенка падчас урачыстага сходу, прысвечанага стагоддзю дзяржаўнай аптэчнай сеткі Магілёўшчыны, перадае карэспандэнт сайта.

Адлік гісторыі прадпрыемства пачаўся 11 лістапада 1918 года, калі быў арганізаваны губернскі фармацэўтычны пададдзел пры губернскім аддзеле аховы здароўя Магілёва. За доўгую гісторыю прадпрыемства не раз мяняла назву, падпарадкаванасць і структуру, але нязменна заставалася аддадзена свайму прызванню: своечасовае, якаснае, даступнае і кваліфікаванае лекавае забеспячэнне насельніцтва вобласці.

Сёння Магілёўскае РУП «Фармацыя» – гэта 240 аптэк, склад, кантрольна-аналітычная лабараторыя і даведачна-інфармацыйная служба. У аснове дзейнасці – клопат пра здароўе людзей, пашырэнне аптэчнай сеткі і высокая якасць лекавага забеспячэння з выкарыстаннем перадавых метадаў і новых тэхналогій. Асартымент сучасных аптэк налічвае каля 6 тыс. найменняў, з якіх больш за 3 тыс. – лекавыя сродкі. З году ў год пашыраецца асартымент айчынных лекаў, доля ў рэалізацыі якіх – больш за 75%. Стабільнае супрацоўніцтва з пастаўшчыкамі, як айчыннымі прадпрыемствамі, так і з буйнымі замежнымі вытворцамі, забяспечвае аператыўнасць і выразнасць паставак, гарантуе якасць тавару.

    

«Мы актыўна пашыраем рознічную сетку, адкрываючы аптэкі ў гандлёвых аб’ектах сучасных фарматаў і ў зонах жылой забудовы з крокавай даступнасцю, – адзначыла Алена Раманенка. – Нашы аптэкі мяняюць свой выгляд, сустракаючы наведвальнікаў у стыльным абліччы, які адпавядае найноўшым тэндэнцыям і патрабаванням. Шырока выкарыстоўваем у сваёй працы інфармацыйныя тэхналогіі: усе этапы руху тавараў у сетцы аўтаматызаваныя».

Першы намеснік звярнула ўвагу, што дзяржаўная аптэчная служба мае свае асаблівасці. І ў першую чаргу гэта сацыяльная накіраванасць. Прадпрыемствы «Фармацыі» забяспечваюць лекавымі сродкамі ўстановы аховы здароўя вобласці, ажыццяўляюць водпуск лекаў па бясплатных і льготных рэцэптах. Дзяржаптэкі размешчаны не толькі ў гарадах і райцэнтрах. Да паслуг вяскоўцаў – 44 аптэкі з неабходным асартыментам лекаў. У 24 аптэках рэгіёна захоўваецца традыцыйная функцыя – аптэчны выраб лекавых сродкаў. Кругласутачна адкрыты для наведвальнікаў 2 аптэкі.

Ёсць у «Фармацыі» яшчэ адна важная задача: яна з’яўляецца базай для праходжання практыкі навучэнцамі мясцовага каледжа. Выпускнікі з вышэйшай фармацэўтычнай адукацыяй на базе дзяржаптэк праходзяць інтэрнатуру.

100 гадоў – гэта ўстоеныя традыцыі, але прадпрыемства не магло развівацца само па сабе. Поспех любой арганізацыі не абыходзіцца без работнікаў. Сёння Магілёўскае РУП «Фармацыя» аб’ядноўвае 1276 чалавек, якія добрасумленна і прафесійна выконваюць свае абавязкі. Вялікая роля ў станаўленні прадпрыемства належыць яго кіраўнікам – гэта Ганна Розіна, Уладзімір Шумскі, Аляксей Яшчанка, Тамара Міронава, Святлана Кісялёва, Валянціна Ігнаценка. «Для нас важны ўклад кожнага супрацоўніка, унесены ў развіццё прадпрыемства, – падкрэсліла Алена Раманенка. – Дзякуй усім, хто прысутнічае ў гэтай зале, і тым, хто цяпер на працоўных месцах. Асаблівая падзяка ветэранам за вытрымку, адказнасць, жаданне працаваць для здароўя людзей, самаадданую працу і любоў да прафесіі».

Падчас урачыстага сходу шэраг супрацоўнікаў «Фармацыі» атрымаў заслужаныя ўзнагароды: ганаровыя граматы і падзякі Міністэрства аховы здароўя, Магілёўскага абласнога, гарадскога і Бабруйскага выканаўчых камітэтаў, адміністрацый раёнаў Магілёва і Бабруйска, Рэспубліканскага камітэта Беларускага прафсаюза работнікаў аховы здароўя, гандлёва-вытворчага рэспубліканскага ўнітарнага прадпрыемства «Белфармацыя» і інш. Знак «Выдатнік аховы здароўя Рэспублікі Беларусь» уручылі загадчыку аптэкі № 127/8 Бабруйска Ірыне Русаковіч. Узнагародным знакам «Прафсаюзны лідар» узнагароджана старшыня камісіі па культурна-масавай і фізкультурна-аздараўленчай працы аб’яднанай прафсаюзнай арганізацыі, намеснік загадчыка Шклоўскай цэнтральнай раённай аптэкі №38 Іна Сулкоўская. Члену прафсаюзнага камітэта аб’яднанняў прафсаюзнай арганізацыі, загадчыку Круглянскай цэнтральнай раённай аптэкі №44 Вользе Цяслюк уручылі нагрудны знак «Ветэран».

      

Пры выкарыстанні матэрыялаў актыўная гіперспасылка на mogilev-region.gov.by абавязковая