Рус Бел Eng 中文

Абласны семінар-практыкум па лозапляценні з удзелам народнага майстра Рэспублікі Беларусь Таццяны Фяськовай адбыўся ў Магілёве

Лозапляценне, як адзін з найбольш распаўсюджаных на Магілёўшчыне відаў народнага рамяства, у апошні час перажывае сапраўднае адраджэнне, піша газета ”Магілёўскія ведамасці”.

У мэтах далейшага распаўсюджвання гэтага майстэрства ў Магілёўскім абласным метадычным цэнтры народнай творчасці і культурна-асветніцкай работы адбыўся абласны семінар-практыкум па лозапляценні з удзелам народнага майстра Рэспублікі Беларусь Таццяны Фяськовай.

У нашай вобласці славяцца цудоўныя вырабы з гнуткай лазы майстроў Галіны Сцепаньковай і Тамары Багдановіч з Горацкага раёна, Мікалая Белазора з Клічаўшчыны, Аляксея Месніка з глускай вёскі Заеліца і іншых.

Але яшчэ есць шмат жадаючых асвоіць працаёмкае, але дзіўнае майстэрства. Таму на семінар з’ехаліся з раёнаў 18 спецыялістаў Дамоў рамёстваў, дзіцячых школ мастацкіх рамёстваў, кіраўнікоў студый і гурткоў дэкаратыўна-прыкладнога мастацтва.

Таццяна Міхайлаўна першым чынам вучыла ўдзельнікаў практыкуму плесці донца вырабу – з заданнем справіліся ўсе прысутныя. Больш таго, асобныя здолелі самастойна зрабіць свае першыя вырабы – хлебніцы, сухарніцы, кошыкі.

Будучыя лозапляцельшчыкі прасілі, каб падобныя семінары праводзіліся і ў будучым. Дарэчы, у гэтым годзе ў абласным метадычным цэнтры адбыліся тры семінары-практыкумы па ткацтве ў рамках дзеючай студыі «Чароўны куфэрак», а таксама – па кераміцы. У бліжэйшы час пройдзе яшчэ адзін – па ткацтве і карункавязанні.

При использовании материалов активная гиперссылка на mogilev-region.gov.by обязательна