Рус Бел Eng 中文

Асіповіцкі “Аўтапарк № 19” набыў камфартабельны аўтобус турыстычнага класа

“Аўтапарк № 19” ужо даўно займаецца арганізацыяй турыстычных паездак, аднак асаблівых поспехаў у гэтым сектары сферы паслуг пакуль не мае. Прычын таму дастаткова шмат і адна з галоўных — адсутнасць спецыялізаванай, зручнай для аўтатурызму, тэхнікі.

Напачатку сакавіка аўтапарк зноў рашуча ўступіў у канкурэнтную барацьбу за права абслугоўваць асіповіцкіх падарожнікаў, прычым, як здаецца, на гэты раз з адчувальнымі перспектывамі на поспех.

Дзеля дасягнення доўгачаканай мэты быў набыты камфартабельны аўтобус турыстычнага класа. Канкрэтная мадэль выбіралася з разлікам, каб яго эксплуатацыя была рэнтабельнай нават пры меншым, чым у канкурэнтаў, кошце білетаў. Відавочна, што асабліва адчувальнай эканомія грошай для кліентаў будзе ў доўгіх вандроўках, таму прадпрыемства мае намер арыентавацца менавіта на пазнавальныя падарожжы па Беларусі і бізнес-туры на папулярныя рынкі Украіны.

Першым крокам у “раскрутцы” актуальнай камерцыйнай ініцыятывы “Аўтапарка № 19” стала арганізацыя экскурсіі работнікаў Асіповіцкай дыстанцыі сігналізацыі і сувязі ў спартыўны комплекс “Раўбічы”. Удзельнікі паездкі засталіся вельмі задаволенымі, так што “пілотнае” падарожжа стала яшчэ і ўдалай рэкламнай акцыяй.

”Асіповіцкі край”

При использовании материалов активная гиперссылка на mogilev-region.gov.by обязательна