Рус Бел Eng 中文

Да канца года ААТ “Бялыніцкі пратэінавы завод” павінен перайсці на рэжым трохзменнай работы

Да канца года ААТ “Бялыніцкі пратэінавы завод” павінен перайсці на рэжым трохзменнай работы. Такую задачу паставіў перад дырэкцыяй таварыства і працоўным калектывам губернатар Магілёўшчыны Пётр Руднік, які сёння ў рамках свайго рабочага візіту на Бялыніччыну наведаў гэта прадпрыемства.

Кіраўнік вобласці пазнаёміўся з умовамі працы работнікаў таварыства, тэхналогіяй атрымання бялкова-вітаміннай мукі, а таксама пабываў на ўнікальнай кацельні, якая спажывае атрыманы на прадпрыемстве тэхнічны тлушч. Да слова сказаць, гэты праект стаў не толькі значным прарывам у справе эканоміі і беражлівасці (за суткі эканоміцца амаль 2 тысячы метраў кубічных газавага паліва, больш як у два разы скарацілася спажыванне электраэнергіі), але і палепшыў экалагічную сітуацыю Бялынічаў.

Падчас сустрэчы з працоўным калектывам ААТ “Бялыніцкі пратэінавы завод” Пётр Руднік не толькі падрабязна спыніўся на характарыстыцы сацыяльна-эканамічнай сітуацыі ў вобласці і рэспубліцы, але і паставіў шэраг канкрэтных задач перад дырэкцыяй і работнікамі прадпрыемства. Ім неабходна, напрыклад, да канца бягучага года перавесці вытворчасць у неперарыўны трохзменны рэжым, асвоіць выпуск запатрабаванага корму для жывёлы, які, да слова, Беларусь цяпер імпартуе, павялічыць месячны аб’ём выпуску бялкова-вітаміннай мукі да 2,5 тысячы тон.

Зразумела, для таго, каб паспяхова вырашыць пастаўленыя задачы, неабходна стварыць да 10 новых рабочых месцаў, значна пашырыць геаграфію сыравіннай зоны, набыць новыя спецаўтамабілі. Сваю дапамогу ў гэтым Пётр Міхайлавіч завадчанам гарантаваў. Губернатар Магілёўшчыны таксама наведаў ААТ “Новая Друць”, дзе ўпершыню ў рэспубліцы асвоены выпуск катыённага крухмалу, арганізавана вытворчасць пітной і мінеральнай вады, дзейнічае прадпрыемства па вырабе шнуркоў і вырошчваецца жэнь-шэнь. Пабываў Пётр Руднік і на Запольскім малочна-таварным комплексе ААТ “Падзевічы”.

У рамках свайго рабочага візіту на Бялыніччыну кіраўнік вобласці правёў асабісты прыём грамадзян, у час якога па розных жыццёвых пытаннях да губернатара звярнуліся пяць чалавек.

zara.by

При использовании материалов активная гиперссылка на mogilev-region.gov.by обязательна