Рус Бел Eng 中文

Горацкі раён арганізуе выставу беларускай народнай творчасці ў аддзяленні Пасольства Рэспублікі Беларусь у Смаленску

Культура Горацкага раёна 1 ліпеня будзе ладзіць выставу беларускай народнай творчасці ў аддзяленні Пасольства Рэспублікі Беларусь у Смаленску. З нагоды галоўнага свята нашай краіны – Дня Незалежнасці – тут пройдуць урачыстыя мерапрыемствы. У іх прымуць удзел кіраўнікі адміністрацыі, дзелавая эліта і бізнес-колы Смаленскай вобласці.

Галоўная ўрачыстасць адбудзецца ў дзяржаўным драматычным тэатры імя А. С. Грыбаедава. Плануецца ўдзел Прэзідэнцкага аркестра Рэспублікі Беларусь. А выстава – за горацкімі талентамі. Раён адпраўляе ў Смаленск ўзорную дзіцячую студыю “Чарадзейка”. Дзяўчынкі са школы мастацкіх рамёстваў прадэманструюць там арыгінальныя калекцыі касцюмаў з саломкі, як ужо бачаныя гледачом, так і “свежыя”. А майстры дэкаратыўна-прыкладнога мастацтва ў рэжыме рэальнага часу прадэманструюць працэс нараджэння іх шэдэўраў з розных прыродных матэрыялаў.

Горкі едуць у Смаленск таксама са сваёй мінеральнай вадзіцай. Прыватнае прадпрыемства “Праметэй”, якое займаецца здабычай яе з нетраў зямлі, арганізуе дэгустацыю і продаж “Горацкай”. Гэта робіцца і з мэтай прасоўвання беларускай прадукцыі на рынак суседняй вобласці Расійскай Федэрацыі.

Раёная газета “Горацкі веснік”

При использовании материалов активная гиперссылка на mogilev-region.gov.by обязательна