Рус Бел Eng 中文

Горацкая таленавітая моладзь сустрэлася са старшынёй райвыканкама

Кіраўніцтва Горацкага раёна ў Міжнародны дзень абароны дзяцей запрасіла на прыём у райвыканкам інтэлектуальную і здольную моладзь. З пераможцамі розных прадметных алімпіяд, творчых конкурсаў і фестываляў сустрэўся старшыня райвыканкама Ігар Макар.

Ён прызнаўся, што шчыра радуецца паведамленням аб поспехах жыхароў раёна, якія паступаюць даволі часта. Вось і з “Залатой пчолкі” горацкія таленты прывезлі нямала ўзнагарод. Вікторыя Валынцава “ўзяла” Гран-пры ў дэкаратыўна-прыкладным мастацтве. Арцём Голубеў, маленькая, але даволі яркая эстрадная “зорачка”, ўзнагароджаны дыпломам першай ступені.

Улада, у тым ліку і на раённым узроўні, імкнецца падтрымліваць школьнікаў, якія вызначаюцца ў вучобе ці творчасці. На майскім пасяджэнні райвыканкам прыняў рашэнне аб прысуджэнні персанальных прэмій навучэнцам, якія дасягнулі высокіх рэзультатаў у інтэлектуальнай дзейнасці. У раёне ёсць прыклады, калі сельгаспрадпрыемствы выплочваюць выдатнікам мясцовых школ стыпендыі. Так робяць у СПК “Аўсянка”, бо заўтра сённяшнія школьнікі пры добрых адносінах да іх ахвотна папоўняць рады працаўнікоў на палях і фермах гаспадаркі.

Ігар Макар шчыра пажадаў школьнікам, каб ажыццявіліся іх мары і яны знайшлі тую справу, якая б заўсёды радавала душу. А прымяненне сіл, талентаў лагічна было б праявіць у сваім родным раёне, якому патрэбны свежы прыток працавітых, надзейных, падкаваных добрымі ведамі кадраў.

Рабяты змаглі задаць старшыні пытанні. Яны цікавіліся перспектывай раёна ў сувязі з плануемымі тут рэспубліканскімі “Дажынкамі”, што робіць улада для таго, каб моладзь заставалася на роднай зямлі, і іншымі. На пытанне “Якая будучыня чакае наша пакаленне?” Ігар Макар без роздуму адказаў: “Добрае і шчаслівае, але ж яно ў вашых руках”.

Старшыня райвыканкама ўручыў школьнікам грашовыя прэміі. А вучаніца школы №1 Марыя Журава падзякавала кіраўніку раёна за бацькоўскі клопат і ўручыла ад рабят кветкі. Намеснік старшыні Горацкага раёна Наталля Карнеева агучыла ідэю стварыць школьны парламент, які разам з уладай займаўся б вырашэннем пытанняў, напрыклад, добраўпарадкаваннем горада. Прапанову Ігар Макар тут жа падтрымаў. Пасля гэтага ён запрасіў навучэнцаў у свой рабочы кабінет, дзе і быў зроблены агульны здымак. Магчыма, праз колькі гадоў хтосьці з сённяшніх горацкіх інтэлектуалаў прымерыць такое ж крэсла кіраўніка і, можа, не толькі раёна.

Па матэрыяле газеты “Горацкі веснік”

При использовании материалов активная гиперссылка на mogilev-region.gov.by обязательна