Рус Бел Eng 中文

Косці старажытнага маманта двойчы за апошні тыдзень знаходзілі ў Магілёве

Косці старажытнага маманта двойчы за апошні тыдзень знаходзілі ў Магілёве. Адміністрацыя “Гарвадаканала” звярнулася на кафедру археалогіі і спецыяльных гістарычных дысцыплін МДУ імя А.А. Куляшова з просьбай агледзіць незвычайную знаходку: у катлаване – раён прыватнай забудовы каля вул. Габраўскай – на глыбіні чатырох з паловай метраў экскаватар нечакана выкапаў рэшты вялізнай жывёлы.

Як звычайна ў такіх выпадках, на месца здарэння выехаў загадчык кафедры, прафесар Ігар Марзалюк. Высветлілася, што працоўныя адкапалі так званы “атлант” – гэта верхні пазванок шыі, які мацаваў галаву маманта да тулава. Літаральна праз некалькі дзён працоўныя знайшлі рабрыну жывёлы.

Па меркаванні Ігара Марзалюка, косткі маманта датуюцца прыблізна 12 тысячагоддзем да нашай эры, а гэта значыць – побач з мамантамі ўжо маглі жыць і людзі. Адказаць на пытанне, чаму загінула гэта жывёла, цяжка: магчыма, мамант быў упаляваны першабытнымі людзьмі, а, магчыма, загінуў ад нейкага катаклізму.

“Гэты мамант, верагодна, мог быць адным з апошніх на тэрыторыі сучаснага Падняпроўя”, – адзначае навуковец. Зараз косткі жывёлы захоўваюцца ў магілёўскім універсітэце. Далей іх будуць вывучаць эксперты, а потым, хутчэй за ўсё, яны апынуцца ў адным з музеяў абласнога цэнтра.

Фота і інфармацыя прадастаўлены супрацоўнікамі кафедры

археалогіі і спецыяльных гістарычных дысцыплін

МДУ імя А.А. Куляшова

При использовании материалов активная гиперссылка на mogilev-region.gov.by обязательна