Рус Бел Eng 中文

Першую аперацыю на новым эндаскапічным комплексе ў Бялынічах плануецца правесці 19 чэрвеня

Людзі – гэта асноўны капітал кожнай краіны, а таму іх здароўю і медыцынскаму абслугоўванню заўсёды надаецца асаблівая ўвага. Аднак, калі раней большасць беларусаў імкнулася прайсці лячэнне ў бальніцах буйных гарадоў, то зараз і рэгіянальныя ўстановы аховы здароўя забяспечваюцца ўсім неабходным для дыягностыкі і лячэння сучасным медабсталяваннем.

Бялыніцкая цэнтральная раённая бальніца не з’яўляецца выключэннем. Штогод за сродкі рэспубліканскага бюджэту сюды паступае новая медыцынская тэхніка. Нядаўна ва ўстанову паступіла чарговая яе партыя.

Па словах галоўнага ўрача ЦРБ Віктара Пянькоўскага, усё атрыманае абсталяванне — унікальнае. Чаго толькі вартыя наркозна-дыхальны апарат для падтрымкі дыхання дзяцей з моманту нараджэння, японскі гематалагічны аналізатар, які дазваляе атрымаць вынікі аналізу крыві па 20 паказчыках за адну хвіліну?!

У апошні час многія жыхары раёна пакутуюць на хваробы страўніка, дарэчы прыйшоўся і відэаэндаскапічны комплекс з фібрагастраскопам для абследавання гэтага органа. Дзякуючы яму, работу страўніка можна назіраць па маніторы.

«Я з’яўляюся пастаянным пацыентам лор-урача, — дзеліцца ўражаннямі бялынічанка Вольга Нікалаенка. – У апошні час прыходзіць да яго на прыём – адно задавальненне. Апроч таго, што праведзены добры рамонт памяшкання, радуе і наяўнасць новага медыцынскага абсталявання, з дапамогай якога выздараўленне праходзіць найхутчэй».

«Нягледзячы на выдатныя характарыстыкі кожнага з набытых апаратаў, найгалоўнейшым падарункам нашай бальніцы лічу хірургічны эндаскапічны комплекс, — падкрэслівае Віктар Пянькоўскі. – Яго ўнікальнасць заключаецца ў тым, што ён дазваляе праводзіць аперацыі без разрэзаў. Хірург абмяжоўваецца толькі некалькімі праколамі і з выкарыстаннем своеасаблівай відэакамеры мікраскапічным інструментам выдаляе пашкоджаны орган. Літаральна праз пяць дзён пацыент можа быць выпісаны дадому».

Зараз спецыялісты ЦРБ знаходзяцца на вучобе, дзе асвойваюць новы эндаскапічны комплекс. А першую аперацыю на гэтым абсталяванні плануецца правесці да Дня медыцынскага работніка, які святкуецца 19 чэрвеня.

Па матэрыялах газеты “Зара над Друццю”

При использовании материалов активная гиперссылка на mogilev-region.gov.by обязательна