Рус Бел Eng 中文

Прыватныя бізнесмены ў Бялыніцкам раёне паступова фарміруюць знак якасці

У прыватным унітарным прадпрыемстве “Аўтадопмотарс”, якое размешчана ўсяго ў паўтары сотні метраў ад шашы “Мінск-Магілёў” пры ўездзе ў г.п. Бялынічы з боку сталіцы, рамантаваць свайго чатырохколавага сябра – справа надзейная. Прасторная, адмыслова пабудаваная, майстэрня на некалькі рамонтных месцаў абсталявана не толькі глядзельнай нішай, але і электрападымальнікамі, прыборамі дыягностыкі. Але самая галоўная адметнасць аўтасэрвісу – яго гаспадар.

Віталь Цялегін з адзнакай скончыў механічны факультэт універсітэта, мае не толькі глыбокія веды па тэорыі механізмаў і машын, але і багаты практычны вопыт узнаўлення не толькі тэхнікі айчыннай вытворчасці, але і самых сучасных мадэляў іншамарак. «Пры неабходнасці заўсёды рамантую свой “FIAT” на прадпрыемстве Віталя Пятровіча,— паважліва выказваецца аб гаспадары “Аўтадопмотарс” пастар царквы “Новае жыццё” Сяргей Юрку. – Тут не толькі вельмі якасна і хутка ўзнаўляюць аўтамабіль, але і не завышаюць цэны на паслугі».

У самой майстэрні і на прылеглай тэрыторыі размешчаны з дзясятак аўтамашын. Адны аўтаўладальнікі, задаволеныя якасцю выкананых рамонтных работ, з удзячнасцю ад’язджаюць на ўзноўленай тэхніцы, іншыя – аддаюць свае машыны ў рукі майстроў. Дарэчы, разам з Віталем Пятровічам тут вось ужо некалькі гадоў плённа працуе Ігар Карпін.

«Залатыя рукі ў спецыяліста, — коратка характарызуе яго Віталь Цялегін. – Практычна здольны выканаць любую тэхналагічную аперацыю».

І гэта добра ведаюць кліенты аўтасэрвісу.

«Магу сцвярджаць, што нідзе ў радыусе ста кіламетраў ніхто лепш за рамонтнікаў прадпрыемства “Аўтадопмотарс” аўтамабіль не наладзіць, — аўтарытэтна заўважыў у гутарцы бялынічанін Мікалай Фяськоў. – Вось і цяпер мой “Фальксваген” пасля рамонту служыць як новенькі».

Пакідаючы прадпрыемства Віталя Цялегіна, міжволі падумалася: як добра, што прыватныя бізнесмены ў раёне паступова фарміруюць знак якасці, які адпавядае ўзрастаючым патрабаванням кліентаў. У рэшце рэшт гэта самы правільны вектар у павышэнні якасці жыцця.

«Зара над Друццю»

При использовании материалов активная гиперссылка на mogilev-region.gov.by обязательна