Рус Бел Eng 中文

Трое жыхароў з Кіраўскага і Клімавіцкага раёна перасягнулі стогадовы ўзрост

1 сакавіка ў жыцці жыхара в.Казулічы Кіраўскага раёна Ігната Габруся адбылася важная падзея —яму споўнілася 100 гадоў.

На свой лёс Ігнат Цімафеевіч не скардзіцца: як кажуць, усё ўдалося — і дом пабудаваў, і трох сыноў з дачкой выгадаваў, і сад пасадзіў. Зараз дзядуля мае 6 унукаў і столькі ж праўнукаў.

Ігнат Габрусь абараняў Радзіму ад ворага ў гады Вялікай Айчыннай вайны, затым разам з іншымі аднавяскоўцамі аднаўляў разбураную народную гаспадарку. І заўсёды яго вызначалі адказнасць, стараннасць, сумленнасць. А яшчэ ён — прыхільнік здаровага ладу жыцця: ніколі не курыў, не злоўжываў спіртнымі напіткамі.

Стогадовы ўзрост перасягнулі таксама Дар'я Кавалёва i Алёна Петрачэнка, жыхаркі вёсак Перавалошня i Сінеж Клімавіцкага раёна.

Алёна Фёдараўна жыве з 78-гадовай дачкой Праскоўяй. Доўгажыхарка выхавала дваіх дзяцей, мае шэсць унукаў, трох праўнукаў i столькі ж прапраўнукаў. Доўгі час бабуля працавала ў паляводчай брыгадзе. Ведала шмат народных песень i танцаў.

Калі зазірнуць у пашпарт Алёны Петрачэнкі, то дата яе нараджэння прыпадае на 1910 год. Але, як сцвярджае яе дачка, бабуля з'явілася на свет значна раней.

“Маці часта расказвала мне, што дата яе нараджэння па дакументах недакладная. Уся справа ў тым, што раней, у гады яе маладосці, пашпартоў не было, а калі ix пачалі выдаваць, то многія людзі наўмысна «маладзілі» свой узрост. Мая маці таксама была ў гэтым шэрагу”, — тлумачыць Праскоўя Ягораўна.

Мясцовыя жыхары сакрэт доўгажыхарства сваёй зямлячкі тлумачаць наступным чынам: была вельмі працавітай, вясёлай, добразычлівай. А аптымізм, як вядома, станоўча адбіваецца на здароўі кожнага чалавека.

Па матэрыялах раёных газет “Родная ніва” і “Кіравец”

При использовании материалов активная гиперссылка на mogilev-region.gov.by обязательна