Рус Бел Eng 中文

У Асіповіцкім раёне прайшоў семінар-практыкум школы дыскатэчных вядучых

Напрыканцы сакавіка ў Вяззеўскім СДК (Асіповіцкі раён) у другі раз прайшоў семінар-практыкум школы дыскатэчных вядучых. Сюды завіталі магілёўскія каардынатары праекта і прадстаўнікі дыскаклубаў з 5 раёнаў вобласці. Мерапрыемствы такога кшталту звычайна спалучаюць у сабе сур’ёзную тэарэтычную і забаўляльную практычную часткі.

Семінар адкрыла вядучы метадыст аблметадцэнтра Святлана Сарока. “Школы вядучых арганізаваны толькі ў нашай і Мінскай абласцях. Мэта гэтага праекта — сабраць разам і пазнаёміць дыскатэчнікаў з розных рэгіёнаў, паспрыяць абмену вопытам між імі і падрыхтаваць супольны праект, які б змог здзівіць краіну. З усіх трох зон, на якія падзелена вобласць, нас больш за ўсё ўразілі заняткі менавіта ў асіповіцкай”.

Сёлета Магілёўшчына зноў прымае рэспубліканскі семінар па арганізацыі дыскатэк. Летась рэгіён заняў на ім ІІ месца за беларускамоўную шоу-праграму, цяпер вырашылі рабіць стаўку на такі ж фармат. Варта грунтоўна падрыхтавацца да семінара: прагледзець творчыя праекты ўсіх удзельнікаў школы вядучых і адабраць лепшае для зборнай, якая будзе прадстаўляць вобласць.

Змястоўнай і жывой была лекцыя на тэму “Драматургія і рэжысура дыскапраграм”. Жанчына актыўна кантактавала з публікай і давала многа практычных парад.

На мінулым семінары ўдзельнікі атрымалі цікавае хатняе заданне: падрыхтаваць беларускамоўную шоу-праграму. І яны някепска справіліся з пастаўленай задачай. Пасля прэзентацыі 6 творчых праектаў усім стала зразумела: на дыскатэцы можна не толькі смела выкарыстоўваць родную мову, але і цікава абыграць нашы нацыянальныя адметнасці. Пацвярджэнняў таму было нямала. Можна, як бабруйчане і быхаўчане, праводзіць вясёлыя конкурсы народных прыпевак і танцаў. Альбо спяваць у эстраднай манеры народныя песні, як гэта рабілі дзяўчаты з вяззеўскага гурта “Нон-стоп”. Ці, па прыкладу клічаўцаў, чытаць беларускамоўны рэп у вышыванках і спалучаць у падтанцоўцы брэйк-данс і народную харэаграфію.

«Асіповіцкі край»

При использовании материалов активная гиперссылка на mogilev-region.gov.by обязательна