Дзіцячая ўзорная студыя выяўленчага мастацтва “Мастыхін”, якая дзейнічае пры школе мастацкіх рамёстваў у Горках, атрымала ганаровую магчымасць прадставіць работы сваіх навучэнцаў на выставе ў Магілёўскім абласным музеі імя П. В. Масленікава.

Магіляўчане ўпершыню змогуць пазнаёміцца з экспазіцыяй юных горацкіх мастакоў. Гэта стала магчымым дзякуючы намаганням кіраўнікоў “Мастыхіна” Аляксандра Шаўцова і Алены Бруй. Гэта прафесіяналы, якія імкнуцца передаць таленавітым выхаванцам усе свае ўменні і майстэрства, прыцягваюць іх да ўдзелу ў конкурсах і выставах рознага ўзроўню. Таму, можна сказаць, што работы хоць і дзіцячыя, але выкананы яны прафесійна.

26 экспанатаў выставы, большасць з якіх пейзажы рознага фармату ў розных тэхніках: гуаш, акварэль, алей, крэйды, пастэль. Узрост аўтараў ― ад 12 да 18 гадоў. Таму, як лічаць супрацоўнікі музея, выстава больш зацікавіць наведвальнікаў дзіцячага узросту. Але ж для развіцця эстэтычнага і мастацкага густу экспазіцыю карысна наведаць і дарослым.

30 сакавіка падчас адкрыцця можна будзе пазнаёміцца з аўтарамі і іх настаўнікамі, пачуць гісторыі стварэння экспанатаў, пацікавіцца сакрэтамі поспеху юных мастакоў, многія з якіх з’яўляюцца пераможцамі конкурсаў і фестываляў самых розных узроўняў.

Адкрыццё экспазіцыі адбудзецца ў 14. 00.

Газета “Горацкі веснік”