Рус Бел Eng 中文

Выстава «Кветкі для Бэлы» адкрылася ў Магілёве

Персанальная выстава віцебскай мастачкі Святланы Урублеўскай адкрылася ў Магілёве. Экспазіцыя атрымала назву «Кветкі для Бэлы» і прымеркавана да 100-гадовага юбілею вяселля Марка Шагала і яго каханай. На выставе прадстаўлена больш за 40 графічных работ, выкананых у розных мастацкіх тэхніках.

Свет мастацтва і літаратуры ад даўніны да сучаснасці ведае нямала гісторый кахання: пяшчотнага і гарачага, няшчаснага і ўзаемнага. Дантэ і Беатрычэ, Сальвадор Далі і Гала, Уладзімір Маякоўскі і Лілія Брык, Марк Шагал і Бэла. Сёлета спаўняецца роўна 100 гадоў, як малады віцебскі мастак Мойша Сегал, які сёння вядомы свету як вялікі прадстаўнік мастацкага авангарду XX стагоддзя, і яго каханая Бэла Розэнфельд сталі мужам і жонкай. Гісторыя іх кахання працягвае натхняць і сёння. Віцебская мастачка Святлана Урублеўская, чыя выстава адкрылася ў Магілёве, — не выключэнне. Паводле яе слоў, пачуцці Шагала да Бэлы натхнілі яе на цэлую серыю работ. Як прызнаецца мастачка, ёй падабаецца эксперыментаваць — спрабаваць новыя тэхнікі і падыходы, аднак любімым матэрыялам мастачкі застаецца акварэль.

Сярод твораў, прадстаўленых на выставе ёсць і абстрактныя. Яны чымсьці нагадваюць мастацтва японскай каліграфіі і адсылаюць гледача да культуры краіны Узыходзячага сонца. Як адзначае намеснік дырэктара па навуковай рабоце Магілёўскага абласнога мастацкага музея імя Масленікава Святлана Строгіна, сімвалічна, што экспазіцыя работ таленавітай жанчыны-мастачкі з Віцебска ў нашым горадзе адкрылася напярэдадні 8 сакавіка: выстава атрымалася вельмі трапяткай, прыгожай і па-сапраўднаму вясновай.

Выстава «Кветкі для Бэлы» будзе працаваць у Магілёве да 5 красавіка.

По материалу «Радио «Могилев»

При использовании материалов активная гиперссылка на mogilev-region.gov.by обязательна