На стадыёне Магілёўскай гарадской СДЮШАР №7 адбылося абласное жаночае футбольное дэрбі. “Надзея-Днепр” і “Бабруйчанка” сутыкнуліся ў чацвёрты і апошні раз у бягучым сезоне.

Баланс гульняў быў на карысць магіляўчанак: дзве перамогі пры адной нічыёй. Рэабілітавацца за невельмі удалыя вынікі ў супрацьстаяннях з камандай Аляксандра Ластачкіна “Бабруйчанка” у сераду, 5 лістапада, не здолела. У першым тайме Валянціна Ніжагародава двойчы засмуціла галкіпера саперніка – з гульні і з пенальці. У другой палове сустрэчы Анастасія Шчэрбачэня і Любоў Гудчанка забілі яшчэ па мячу. 4:0 – за два туры да заканчэння чэмпіянату “Надзея-Днепр” забяспечвае сабе месца на п’едэстале гонару. А вось якога гатунку медалі ўпрыгожаць скарбонку узнагарод каманды – бронзавыя альбо срэбраныя, вызначаць апошнія гульні з футбольным клубам “Мінск” 9 лістапада і “Зоркай-БДУ” 16 лістапада.

Андрэй Ільеня, прэс-сакратар жаночай футбольнай каманды "Надзея-Днепр"
фотаздымкі Аляксандра Ільені