Вверх

Вы здесь

Званне “Народны майстар Рэспублікі Беларусь” атрымалі чацвёра прадстаўнікоў Магілёўшчыны

Чацвёра таленавітых прадстаўнікоў Магілёўшчыны атрымалі званне “Народны майстар Рэспублікі Беларусь”. Ганаровы статус быў прысвоены на пасяджэнні рэспубліканскай экспертнай камісіі, якое праходзіла ў Мінску.

“Народнымі майстрамі” сталі Ларыса Лямцава з г.п. Круглае (тэкстыльная лялька, ткацтва паясоў), Галіна Сцепанькова з в. Копцеўка Горацкага раёна (лозапляценне), а таксама магіляўчане Ігар Грышын (апрацоўка дрэва) і Наталля Русіян (кераміка). Работы гэтых умельцаў экспанаваліся ў мастацкай галерэі Мінскага абласнога цэнтра народнай творчасці і атрымалі высокую ацэнку экспертнай камісіі.

Дарэчы, на сённяшні дзень на Магілёўшчыне жыве і працуе 14 майстроў з высокім званнем “народны”. Усяго ў краіне – 61.

Адзначым, гэты статус можа надавацца асобе, якая займаецца творчасцю ў галiне народнага дэкаратыўна-прыкладнога мастацтва i ручнога мастацкага рамяства, набыла майстэрства традыцыйным спосабам праз пераемнасць цi ў працэсе самастойнай творчай працы, у сваiм мастацтве i рамястве абапiраецца на традыцыi (мясцовыя, рэгiянальныя, нацыянальныя), творча iх развiвае, праяўляе здольнасцi да iндывiдуальнай iнтэрпрэтацыi.

Гэта распаўсюджваецца на тых народных майстроў, якiя займаюцца традыцыйным рамяством, прадаўжаюць i развiваюць яго традыцыi праз выкананне ўзораў традыцыйных вырабаў; ствараюць мастацкiя каштоўнасцi, што з'яўляюцца працягам народных традыцый, вынiкам мастацкага мыслення, уласцiвага традыцыйнай народнай культуры, адлюстраваннем беларускай нацыянальнай ментальнасцi; а таксама прымаюць удзел у выставах народнай творчасцi, святах-конкурсах, фестывалях i iншых культурна-масавых мерапрыемствах.

 

Если вы заметили ошибку в тексте, пожалуйста, выделите ее и нажмите Ctrl+Enter.