К Международному дню родного языка в шкловской библиотеке запустили марафон «Беларускае – самае маё»

Штогод 21 лютага адзначаецца Міжнародны дзень роднай мовы. З гэтай нагоды бібліятэкі ДУК «Цэнтралізаваная бібліятэчная сетка Шклоўскага раёна» падрыхтавалі цыкл мерапрыемстваў, аб’яднаных у моўны марафон «Беларускае – самае маё», накіраваных на папулярызацыю і захаванне беларускай мовы.

– У рамках правядзення марафону запланаваны акцыі «Роднаму слову – прызнанне ў любові», «Размаўляй са мной па-беларуску», фотаакцыя «Якую кнігу ты параіш пачытаць на беларускай мове?», Дні роднай мовы, – адзначыла загадчык аддзела маркетынгу і сацыякультурнай дзейнасці Валянціна Суткаленка.

На працягу трох тыдняў юныя карыстальнікі бібліятэк раёна знаёмяцца з нормамі моўнага этыкету, адказваюць на пытанні, удзельнічаючы ў розных забаўляльных і гульнявых мерапрыемствах. З 1 па 21 лютага ахвочыя таксама могуць праверыць свае веды па беларускай мове, прыняўшы ўдзел у тэстах і віктарынах.

– Вельмі цікавым аказалася мерапрыемства па прэзентацыі зборніка вершаў мясцовай паэткі Галіны Грахольскай «На плячы Дняпра», – дадала Валянціна Суткаленка. – Яно разлічана на папулярызацыю кнігі і чытання, пашырэнне кругагляду дзяцей і дарослых, выхаванне любові да роднай мовы. Акрамя таго, усе чытачы, якія наведваюць у гэтыя дні бібліятэкі Шклоўскага раёна, могуць азнаёміцца з выставамі «Якая цудоўная родная мова», «Адкрывай свой родны край», «Моўны скарб роднай зямлі» і іншымі.

Татьяна Белецкая, СБ