Абноўленае аддзяленне хуткай дапамогі адкрылася ў Слаўгарадзе

Абноўленае аддзяленне хуткай дапамогі, прыёмны пакой і кабінет інфекцыйных захворванняў адкрыліся сёння ў Слаўгарадскай цэнтральнай раённай бальніцы.

«Усяго тры тыдні спатрэбілася на рамонт першага паверха бальніцы. За гэты час валанцёры з Італіі выраўнялі і пафарбавалі сцены, абліцавалі некаторыя кабінеты пліткай, зрабілі нацяжныя столі, закупілі новую мэблю. З раённага бюджэту на рамонт было выдзелена каля Br 48 тыс. Італьянцы далі на абнаўленне першага паверха каля 40 тыс. еўра», – расказала галоўны ўрач Слаўгарадскай ЦРБ Алена Аксёнава.

Італьянскі дабрачынны фонд «Дапамажы ім жыць» супрацоўнічае са Слаўгарадскай ЦРБ з 2012 года. За гэты час рамонт правялі ўжо ў трох аддзяленнях бальніцы, сярод якіх педыятрыя і дзіцячая кансультацыя. З планаў на будучыню – стварыць на базе бальніцы сучасныя фізіятэрапеўтычнае і хірургічнае аддзяленні.

Усе праекты рэалізуюцца сумесна са Слаўгарадскім раённым выканаўчым камітэтам.