Адкрыты турнір па бодзібілдынгу і фітнесу «Кубак жалезнага льва» адбудзецца 13 красавіка ў Магілёве

Адкрыты асабіста-камандны турнір «Кубак жалезнага льва» пяты раз збярэ аматараў бодзібілдынгу і фітнесу ў Магілёве. Спаборніцтва адбудзецца 13 красавіка ў Палацы культуры вобласці, паведамілі ва ўстанове культуры.

Акрамя беларускіх атлетаў, у турніры возьмуць удзел госці з расійскіх гарадоў – Масквы, Санкт-Пецярбурга, Бранска і Смаленска. Спартсмены будуць змагацца за медалі ў васьмі намінацыях: бодзібілдынг, класічны бодзібілдынг, пляжны бодзібілдынг, фітнес-бікіні, бодзіфітнес, Muscular Mens Physique, Fit-Model і Wellness Fitness.

«Сучасны бодзібілдынг ахоплівае практычна ўсе краіны свету, – адзначылі суразмоўцы. – Уводзяцца новыя намінацыі, каб як мага больш людзей змагло знайсці сябе ў гэтым спорце. Напрыклад, на «Кубку жалезнага льва» ўпершыню будзе прадстаўлены новы кірунак для нашай краіны – Wellness Fitness».