Аляксандр Лабадыроў: сёння мы бачым высокі запыт грамадства на ўдзел у грамадска-палітычных працэсах

Канферэнцыя абласной арганізацыі Ліберальна-дэмакратычнай партыі Беларусі прайшла 17 сакавіка ў Магілёве. Удзел у ёй узялі старшыня абласной арганізацыі ЛДПБ Аляксандр Лабадыроў, начальнік галоўнага ўпраўлення ідэалагічнай работы і па справах моладзі Магілёўскага аблвыканкама Кацярына Музычэнка, старшыні і прадстаўнікі раённых арганізацый партыі.

У ходзе работы разгледжаны пытанні вызначэння колькасці дэлегатаў і іх выбрання на 21 нечарговы з'езд ліберальна-дэмакратычнай партыі Беларусі, які запланаваны ў Мінску 8 красавіка.

«Сёння мы стаім на парозе найважнейшых падзей і прымаем непасрэдны ўдзел у партыйным будаўніцтве грамадзянскай супольнасці нашай краіны. Так, 4 сакавіка бягучага года ўступілі ў сілу заканадаўчыя акты аб змяненні законаў па пытаннях дзейнасці палітычных партый і іншых грамадскіх аб'яднанняў», - адзначыла Кацярына Музычэнка.

Яна падкрэсліла, што чакаецца вялікая праца па навядзенні парадку і прывядзенні ў адпаведнасць з дзейным заканадаўствам усіх партыйных структур. І пазначыла, што на сёння выразна сфарміраванымі з'яўляюцца ліберальна-дэмакратычная, камуністычная і партыя працы і справядлівасці. Таксама намечаны ўстаноўчы рэспубліканскі з'езд па стварэнні партыі «Белая Русь».

«Паводле апошніх звестак прадстаўнікамі абласной арганізацыі Ліберальна-дэмакратычнай партыі Беларусі з'яўляюцца паўтары тысячы жыхароў Магілёўшчыны. У рэгіёнах 15-16 сакавіка прайшлі ўстаноўчыя сходы па вылучэнні дэлегатаў на абласную канферэнцыю. Сёння 60 чалавек будуць абраныя ад вобласці для ўдзелу ў рэспубліканскім з'ездзе, - распавяла Кацярына Музычэнка. - Упэўнена, што выпадковых людзей тут няма і паводле сваіх перакананняў вы пашырыце кола аднадумцаў, якія будуць зацікаўлены ў развіцці нашай краіны і сваіх рэгіёнаў, будуць сумленныя і справядлівыя. І мы разам мабілізуем усе прагрэсіўныя сілы, каб захаваць стабільную абстаноўку ў краіне, уладу, накіраваную на служэнне свайго народа».

Свет мяняецца і з аднапалярнага становіцца шматпалярным. Наша краіна ў ім таксама павінна заняць сваё месца. І вельмі шмат для гэтага робіць наш кіраўнік дзяржавы, у тым ліку, сустракаючыся і падтрымліваючы сувязі з сусветнымі лідэрамі. Павінны прывесці ў адпаведнасць з сучаснымі патрабаваннямі нашу палітычную сістэму і мы з вамі, кожны уносячы свой пасільны ўклад.

Партыя ЛДПБ - гэта партыя магчымасцяў. Куды людзі прыходзяць расказаць пра сябе, свае ідэі, свае погляды на вырашэнне тых ці іншых пытанняў. І сёння мы бачым высокі запыт грамадства на ўдзел у грамадска-палітычных працэсах. Людзі перастаюць быць апалітычнымі».

Пасля афіцыйнай часткі па абранні дэлегатаў на рэспубліканскі з'езд, удзельнікі канферэнцыі атрымалі магчымасць абмяняцца меркаваннямі і досведам, планамі працы ў сваіх рэгіёнах.

«Бабруйская гарадская арганізацыя партыі ЛДПБ існавала даўно, з 2004 года я ўзначальваў яе, пакуль яна не была скасаваная, паколькі для функцыянавання партыі дастаткова было абласных арганізацый. У сувязі з уступленнем у сілу новага закона, узніклі новыя рэаліі і патрэбнасць у іх аднаўленні. Я зноў абраны на пасаду старшыні і варта адзначыць, што за кароткі перыяд часу людзі праявілі высокую цікавасць да партыі. У працоўных калектывах жыва цікавяцца дадзенай тэмай. Мы ўжо правялі шэраг сустрэч на асобных прадпрыемствах горада, атрымалі запрашэнні наведаць і іншыя», - падзяліўся адзін з дэлегатаў Уладзімір Загрышаў.

«Людзі адзначаюць, што надышоў час дзеяння палітычных партый, якія павінны ствараць масты паміж грамадзянамі і палітычнай сілай, - падтрымаў калегу Сяргей Ізмер з Магілёўскага раёна. - Гэта прыемна ўсведамляць і важна пашыраць працу сярод грамадзян, каб іх палітычныя жаданні і імкненні выказваліся праз падобныя «масты».

Юлія Таранава, фота Галіны Гаўрыловіч