Бабруйскі завод ТДіА рыхтуецца адзначыць юбілей

Гэты год будзе асаблівым для Бабруйскага завода трактарных дэталяў і агрэгатаў холдынгу МТЗ. У жніўні спаўняецца 75 гадоў Бабруйскай міжраённай майстэрні капітальнага рамонту. Менавіта яна стала базай для гэтага прадпрыемства. І ўжо цяжка назваць «жалезным канём» апошнюю мадэль Бабруйскага трактара «Беларус-742», чыя кабіна нагадвае какпіт авіялайнера, а сістэма кіравання –спарткар. А наперадзе –новая праца і пашырэнне геаграфіі паставак прадукцыі.

Сучасную тэхніку ў Бабруйску робяць на сучасным абсталяванні. Вельмі перспектыўны праект –аўтаматычныя лініі вытворчасці колаў. Тут гарантавана еўрапейская якасць прадукцыі, а значыць – і максімальная колькасць заказаў ад партнёраў. У цэху вырабляюць колы не толькі для ўсіх мадэляў МТЗ, але і іншай сельскагаспадарчай тэхнікі. А ёсць работа – ёсць і заробак.

Яшчэ адзін завадскі гонар – участак гнуткіх тэхналогій. Адзін такі станок выконвае такую ж колькасць аперацый, як раней –больш за паўсотні адзінак абсталявання. А дакладнасць апрацоўкі дэталяў параўнальная з вытворчасцю швейцарскіх гадзінікаў.

Да свайго юбілею бабруйчане падыходзяць з добрым настроем. Тут вырабляюць больш за паўтары тысячы найменняў арыгінальных запчастак да трактароў «Беларус», асвоілі самастойны выпуск больш за 20 мадэляў трактароў і камунальных машын. Завадчане экспартуюць сваю прадукцыю ў 59 краін.

У планах на гэты год –сучасныя мадэлі трактароў для краін Еўрасаюза і Паўднёва-Усходняй Азіі. Падрыхтаваныя да выпуску новыя тыпапамеры колаў для заводаў у Пецярбургу і Растове, Гомелі і Бабруйску. І галоўная гарантыя паспяховай працы прадпрыемства – падтрымка калектыву.

ТРК «Магілёў»