Беларускі дзіцячы фонд арганізаваў трохдзённую экскурсію ў Мінск для выхаванцаў дзіцячых дамоў сямейнага тыпу Магілёўскай вобласці

Магілёўскае абласное аддзяленне Рэспубліканскага грамадскага аб’яднання «Беларускі дзіцячы фонд» арганізавала экскурсійную паездку ў Мінск для выхаванцаў дзіцячых дамоў сямейнага тыпу ва ўзросце ад 9 гадоў, іх бацькоў-выхавальнікаў. У падарожжа, якое прымеркавана да 75-годдзя вызвалення Беларусі ад нямецка-фашысцкіх захопнікаў, сёння адправіліся выхаванцы з Бялыніцкага, Крычаўскага, Круглянскага і Краснапольскага раёнаў.

Падчас трохдзённай экскурсіі яны пазнаёмяцца з памятнымі месцамі Магілёва і Мінска. У сталіцы дзеці пабываюць у Нацыянальнай бібліятэцы, наведаюць гісторыка-культурны комплекс «Лінія Сталіна», музей гісторыі Вялікай Айчыннай вайны, БелАЗ і інш.

Паездка стала магчымай дзякуючы адмысловаму дабрачыннаму сацыяльнаму праекту, накіраванаму на аказанне дапамогі дзіцячым дамам сямейнага тыпу, дзецям-сіротам, дзецям, пакінутым без апекі бацькоў, замяшчальным бацькам. Усе выдаткі па арганізацыі праезду і пражывання ўзяў на сябе дзіцячы фонд.