«Беллегпрам» арганізуе модны паказ на свяце «Александрыя збірае сяброў»

Прадпрыемствы канцэрна «Беллегпрам» прадставяць прадукцыю на рэспубліканскім свяце «Купалле» («Александрыя збірае сяброў»), які пройдзе 6-7 ліпеня, паведамілі ў канцэрне.

Можна будзе набыць адзенне і іншыя тавары вытворчасці Аршанскага льнокамбіната, ААТ «Купалінка», «Сукно», «Віцебскія дываны», «Свiтанак» (Жодзіна), «Бабруйсктрыкатаж», «8 Сакавіка» і «Віцебсктэкстыльгандаль». А 6 ліпеня ў 18.30 адбудзецца модны паказ «Я – Самая!». На адзін вечар адкрытая пляцоўка ператворыцца ў подыум, дзе пакажуць новыя калекцыі ад вядучых брэндаў.

Гулянні традыцыйна пройдуць у маляўнічым месцы на беразе Дняпра, каля моста, які злучае не толькі два населеныя пункты – Александрыю і Копысь, але і дзве вобласці – Магілёўскую і Віцебскую. Галоўнай на свяце стане тэма малой радзімы.

«Купалле» збярэ на сваіх пляцоўках прадстаўнікоў Беларусі, Расіі, Украіны, Эстоніі, Літвы, Латвіі і Польшчы. Дэлегацыі краін-удзельніц прадставяць калектывы народнай творчасці і майстры дэкаратыўна-прыкладнога мастацтва.

На малой сцэне 6 ліпеня адбудзецца ўрачыстае адкрыццё і канцэрты, дзе выступяць творчыя калектывы рэгіёнаў Беларусі і іншых краін – удзельніц свята. Кульмінацыяй першага дня стане гала-канцэрт «Зроблена ў Беларусі» на галоўнай пляцоўцы і феерверк. У ноч з 6 на 7 ліпеня пройдзе маладзёжная дыскатэка з удзелам айчынных выканаўцаў. 7 ліпеня творчыя пляцоўкі працягнуць працу, а на галоўнай сцэне адбудзецца цырымонія ўшанавання перадавікоў аграпрамысловага комплексу вобласці, а затым выступ народнага артыста Беларусі Анатоля Ярмоленкі і ансамбля «Сябры».

Пляцоўка «Творчасць маладых» стане месцам дэманстрацыі спартыўных, творчых, навукова-тэхнічных праграм і дасягненняў моладзі. Тут адбудзецца музычна-гульнявая праграма «Казка пра чароўную кветку», канцэрты маладзёжных творчых калектываў «Пакаленне NEXT» і бардаўскай песні, квэсты. Запланавана работа выставы-кірмашу вырабаў устаноў адукацыі і сацыяльнай абароны Магілёўскай вобласці, паказ лепшых узораў дэкаратыўна-прыкладной і тэхнічнай творчасці.

Цікавай абяцае стаць пляцоўка з цыркавымі выступленнямі. Палёты самалётаў і парашутыстаў прадэманструе Магілёўскі аэраклуб ДТСААФ імя А.М. Кулагіна. Абласны цэнтр фізічнага выхавання і спорту навучэнцаў і студэнтаў арганізуе работу спартыўных пляцовак. Таксама ўсталююць фотазоны, а для маленькіх наведвальнікаў – атракцыёны.

ААТ «Мінскі трактарны завод» прэзентуе сваю прадукцыю на пляцоўцы «Зроблена ў Беларусi». Акрамя таго, на ёй правядуць «Свята квасу» з прэзентацыяй брендавага святочнага напою, распрацаванага па спецыяльнай рэцэптуры.

Падчас фестывалю будуць працаваць павільёны «Кніжны кірмаш» і «Друкарскі двор» з зонамі вытворчасці паперы і друку. Запланаваны прэзентацыі новых кніг і часопісаў, аўтограф-сесіі, конкурсы.

Для таго, каб госці і ўдзельнікі «Купалля» адчувалі сябе камфортна, будзе арганізавана не менш за 3 тыс. пасадачных месцаў у аб'ектах грамадскага харчавання. Працягласць гандлёвай экспазіцыі складзе 1,2 км.

Чакаецца, што ў гэтым годзе прыгожае беларускае свята наведаюць не менш за 100 тыс. чалавек. Пачатак мерапрыемстваў а 14.00, уваход вольны.

Больш падрабязна даведацца пра мерапрыемства можна тут