Белтэлерадыёкампанія будзе весці прамую трансляцыю ўрачыстага адкрыцця ІІ Еўрапейскіх гульняў

Белтэлерадыёкампанія як асноўны вяшчальнік ІІ Еўрапейскіх гульняў 2019 года прадаставіць увазе тэлегледачоў прамую трансляцыю ўрачыстага адкрыцця кантынентальнага спартыўнага форуму, якая адбудзецца на Нацыянальным алімпійскім стадыёне «Дынама» ў Мінску. Пра гэта паведамілі ў прэс-службе медыяхолдынга.

Прамую трансляцыю ўрачыстага адкрыцця спаборніцтваў у 21.50 пачнуць весці «Беларусь 1», «Беларусь 5», «Беларусь 5. Інтэрнэт», а таксама сайт медыяхолдынга tvr.by.

«У падрыхтоўцы шоу задзейнічана больш за 2 тыс. чалавек – артысты, тэхнічныя работнікі, грымёры, касцюмеры, сцэнографы і балетмайстры. На поле стадыёна выйдуць спартсмены з 50 краін-удзельніц. Для стварэння трохмерных рэалістычных аб’ектаў установяць дэкарацыі з мабільных экранаў, а ў агульным будзе выкарыстана 90 т сучаснага высокатэхналагічнага абсталявання. Віртуальныя аб’екты стануць часткай навакольнай прасторы, і іх змогуць убачыць не толькі тыя, хто прыйшоў на стадыён, устанавіўшы спецыяльны дадатак на свае смартфоны, але і тэлегледачы. На свае вочы паназіраць за адкрыццём II Еўрапейскіх гульняў зможа больш за 22 тыс. гледачоў», – расказалі ў прэс-службе.

Галоўная задача цырымоніі – раскрыць багатую гісторыю Беларусі, яе фальклор, чароўныя легенды і паданні, прадставіць помнікі архітэктуры, гістарычных асоб і сучаснікаў. Гледачы акунуцца ў святочную атмасферу таямнічага Купалля, пазнаёмяцца са славянскімі плямёнамі, якія сталі прабацькамі беларускай нацыі, убачаць Ефрасінню Полацкую, Францыска Скарыну, Радзівілаў, Марка Шагала, Янку Купалу, Якуба Коласа і многіх іншых.

Падрабязнасці шоу арганізатары трымаюць у сакрэце, аднак вядома, што ў канцэртнай праграме прымуць удзел найлепшыя беларускія артысты: вядучыя салісты оперы і балета, танцавальныя калектывы, папулярныя выканаўцы. Таксама перад гледачамі выступяць оперная дзіва Ганна Нятрэбка і пераможца «Славянскага базару-2015» Дзімаш Кудайбергенаў.

Кранальным момантам стане завяршэнне эстафеты агню «Полымя міру», якім будзе запалена мадэрнізаваная чаша на стадыёне «Дынама», дзе ўжо гарэлі іскры спартыўнага свята падчас Алімпіяды-80.

Каментаваць старт адной з галоўных спартыўных падзей гэтага лета будуць намеснік галоўнага дырэктара Агенцтва тэленавін Белтэлерадыёкампаніі, вядучая праграмы «Галоўны эфір» Вікторыя Сянкевіч і спартыўны журналіст Белтэлерадыёкампаніі, аўтар і вядучы праекта «Фактар сілы» Павел Баранаў. Акрамя гэтага, у 20.50 у прамым эфіры на «Беларусь 5» выйдзе ток-шоу «Прэв’ю на арэне» з запрошанымі гасцямі і мноствам сюрпрызаў. Для балельшчыкаў, якія не змогуць сачыць за тэлеэфірам, на хвалях Першага нацыянальнага канала Беларускага радыё ў 21.50 стартуе спецыяльны праект, прысвечаны адкрыццю кантынентальнага форума.

У эфіры «Беларусь 1» з самымі важнымі навінамі спартыўнага свята, падзеямі і гасцямі ўжо з 19 чэрвеня і на працягу ўсіх дзён спаборніцтваў з 12.00 да 13.00 і ўвечар у межах «Панарамы» выходзіць праект «II Еўрапейскія гульні. Інфармацыйны канал». У сетцы вяшчання застаюцца таксама і дзённікі Агенцтва тэленавін «Игры.by», якія расказваюць пра форум у лёгкім і нязмушаным фармаце.

Трансляцыі спартыўных спаборніцтваў пачнуцца ўжо сёння раніцай, калі тэлеканал «Беларусь 2» прадставіць у прамым эфіры кваліфікацыю спаборніцтваў па стральбе з лука ў 8.55 і кваліфікацыю турніру па боксе ў 13.10. На «Беларусь 5» гледачы змогуць убачыць матчы папярэдняга раўнда па баскетболе 3х3 у 8.50 і 13.50, а таксама спаборніцтвы па стральбе з лука ў 12.45, 17.45 і нават у 1.15, бо на час гульняў спартыўны тэлеканал становіцца кругласутачным.

На «Беларусь 5. Інтэрнэт» будуць прадстаўлены трансляцыі ў стандартнай для яго форме – без каментарыяў. Дарэчы, у эфір інтэрнэт-канала патрапяць і тыя спаборніцтвы, якія не выйдуць на тэлеканалах, у сетцы яны будуць паказаны ў поўным аб’ёме. З 21 чэрвеня ў эфіры спартыўнага тэлеканала пачне працаваць навінавы «Еўрацэнтр», які будзе выходзіць 5 разоў на дзень. Таксама на час гульняў на «Беларусь 5» выйдзе 12 новых праектаў, з якіх гледачы даведаюцца расклад спаборніцтваў і найбліжэйшых трансляцый, імёны пераможцаў і прызёраў і многае іншае. Спецыяльная праграма «Вынікі дня» штодня будзе знаёміць балельшчыкаў з вынікамі спаборніцтваў. Падрабязны графік тэлевізійных трансляцый спаборніцтваў размешчаны на афіцыйным сайце Белтэлерадыёкампаніі.

II Еўрапейскія гульні пройдуць у Мінску па 30 чэрвеня. Больш за 4 тыс. атлетаў з 50 краін разыграе 200 камплектаў узнагарод у 15 відах спорту.

БЕЛТА