Рус Бел Eng 中文

Больш за 200 спартсменаў з пяці краін прыме ўдзел у турніры па спартыўнай акрабатыцы «Кіндар-сюрпрыз» у Магілёве

Адкрыты традыцыйны рэспубліканскі турнір па спартыўнай акрабатыцы «Кіндар-сюрпрыз» пройдзе 2–7 сакавіка ў Палацы гімнастыкі Магілёва. Пра гэта паведамілі ў гарадской СДЮШАР «Багіма» імя А. Г. Мішчанкі.

Паводле слоў суразмоўцаў, у спаборніцтвах прымуць удзел каманды з Беларусі, Расіі, Украіны, Літвы і Малдовы. Усяго на турніры выступіць больш за 200 спартсменаў у трох узроставых катэгорыях: малодшай (атлеты 6–14 гадоў), AGE GROUP(7–16 гадоў), старэйшай (9–16 гадоў). Гонар Магілёўскай вобласці будуць абараняць выхаванцы дзіцяча-юнацкай спартыўнай школы алімпійскага рэзерву «Багіма», якія маюць добры вопыт выступленняў на рэспубліканскіх і міжнародных турнірах.

Пераможцаў і прызёраў турніру ўзнагародзяць медалямі, граматамі, каштоўнымі падарункамі, а ўсіх без выключэння ўдзельнікаў – сувенірамі. Акрамя прызоў за спартыўныя дасягненні, арганізатары першынства падрыхтавалі сюрпрызы ў спецыяльных намінацыях: за самы высокі бал у дзённіку па выніках паўгоддзя – «Умка турніру», самым юным удзельнікам – «Кіндар спаборніцтваў» і інш.

«У Магілёве спаборніцтвы праводзяцца пятнаццаты год запар. Кожны раз яны выклікаюць усё большую цікавасць як у спартсменаў, так і ў гледачоў, паколькі акрабатыка –вельмі яркі і відовішчны від спорту, – расказалі суразмоўцы. – На «Кіндар-сюрпрызе» спартсмены-пачаткоўцы робяць першыя крокі ў вялікі спорт. Для больш дасведчаных акрабатаў турнір становіцца добрай пляцоўкай, дзе яны могуць удасканаліць майстэрства і атрымаць спаборніцкі вопыт».

Спаборніцтвы праводзяцца з мэтай папулярызацыі, развіцця акрабатыкі ў Магілёўскай вобласці і Беларусі, павышэння і ўдасканалення спартыўнага майстэрства юных акрабатаў, а таксама пашырэння сувязяў па абмене вопытам падрыхтоўкі спартсменаў, умацавання сяброўскіх адносін са спартсменамі іншых краін.

Арганізатарамі спаборніцтваў выступаюць ДСУСУ «Магілёўская гарадская СДЮШАР «Багіма» імя В. Г Мішчанкі», Упраўленне спорту і турызму Магілёўскага аблвыканкама, аддзел спорту і турызму Магілёўскага гарвыканкама.

Генеральным партнёрам мерапрыемства з’яўляецца аператар сотавай сувязі –СТАА «Мабільныя ТэлеСістэмы».

Адкрыццё спаборніцтваў – 4 сакавіка ў 12.30, закрыццё – 6 сакавіка ў 14.00. Уваход вольны.

Пры выкарыстанні матэрыялаў актыўная гіперспасылка на mogilev-region.gov.by абавязковая