RU BY EN 中文
Twitter Instagram

БРСМ падорыць нованароджаным магілёўцам адзенне з беларускім арнаментам

БРСМ падорыць нованароджаным магілёўцам адзенне з беларускім арнаментам. На базе радзільнага дома гарадской бальніцы ХМП 22 чэрвеня адбудзецца абласное мерапрыемства рэспубліканскага праекта «Падары немаўляці вышыванку».

Удзельнікі акцыі (а ў іх ліку першы сакратар Цэнтральнага камітэта ГА «БРСМ», член Савета Рэспублікі Нацыянальнага сходу Дзмітрый Варанюк, першы сакратар Магілёўскага абласнога камітэта ГА «БРСМ» Уладзімір Паўлоўскі, валанцёры руху «Добрае сэрца») з цёплымі пажаданнямі перададуць мамам і іх дзеткам дзіцячае адзенне – распашонкі, чэпчыкі, паўзункі з нацыянальным беларускім арнаментам (сімвалам сонца), букеты васількоў і павіншуюць маленькіх грамадзян краіны з нараджэннем і надыходзячым святам – Днём Незалежнасці.

Для мам на тэрыторыі радзільні пройдзе канцэртная праграма з удзелам таленавітай моладзі Магілёўшчыны, у завяршэнні якой будзе запушчана ў неба 26 паветраных шароў з беларускім арнаментам.

Арганізатарамі мерапрыемства выступаюць Магілёўскі абласны камітэт ГА «Беларускі рэспубліканскі саюз моладзі» сумесна з УА «Магілёўскі дзяржаўны медыцынскі каледж».

БРСМ сёння дае старт рэспубліканскаму праекту «Падары нованароджанаму вышыванку». Урачыстыя ўшанаванні мам і малых пройдуць па ўсёй краіне па 2 ліпеня ў межах рэспубліканскага маладзёжнага праекта «Беларусь–крыніца натхнення». Безумоўна, з улікам эпідсітуацыі пры правядзенні мерапрыемстваў будуць выкананыя ўсе меры гігіены і сацыяльнай дыстанцыі, а ўшанаванні будуць праходзіць на свежым паветры на тэрыторыі ўстаноў аховы здароўя пры выпісцы маленькіх пацыентаў.

Пры выкарыстанні матэрыялаў актыўная гіперспасылка на mogilev-region.gov.by абавязковая