Чарговы Адзіны дзень бяспекі дарожнага руху будзе прысвечаны карысці флікера

Адзіны дзень бяспекі дарожнага руху пад дэвізам «Час стаць прыкметным!» пройдзе 25 верасня. Пра гэта паведамілі ў аддзяленні па агітацыі і прапагандзе ДАІ УУС Магілёўскага аблвыканкама.

У той дзень інспектары нагадаюць пешаходам, веласіпедыстам, а таксама возчыкам гужавых калёсаў аб неабходнасці выкарыстання святлоадбівальных элементаў у цёмны час сутак, раскажуць аб правілах бяспечных паводзін на дарозе ва ўмовах абмежаванай бачнасці.

За 8 месяцаў бягучага года на дарогах Магілёўскай вобласці з удзелам пешаходаў зарэгістравана 83 ДТЗ, у якіх 10 чалавек загінулі і 74 атрымалі траўмы. У цёмны час сутак адбылося 29 аварый.

Суразмоўцы падкрэслілі, што праблема пешаходнага і велатраўматызму асабліва абвастраецца з надыходам восені. Значнае памяншэнне светлавога дня, ранняе змярканне, дажджы і туманы не лепшым чынам адбіваюцца на дарожнай абстаноўцы. Шматгадовая статыстыка даказвае, што менавіта ў гэты перыяд на дарогах павялічваецца колькасць наездаў на ўразлівых удзельнікаў руху.

Як правіла, большасць з наездаў адбываецца ў вячэрні і начны час. Заўважыць чалавека, які пераходзіць праезджую частку або які ішоў па краі дарогі ў гэты перыяд, даволі складана. Аднак калі ў пешахода ёсць флікер, то адлегласць, з якой вадзіцель можа яго ўбачыць, узрастае з 30 м да 150 м. Выкарыстанне святлоадбівальнага элемента памяншае рызыку наезду на пешахода ў цёмны час сутак на 85%.

Неабходнасць выкарыстання пешаходамі святлоадбівальных элементаў і іншыя нормы паводзін на дарозе замацаваны ў Правілах дарожнага руху. У адпаведнасці з арт. 18.23 Кодэкса Рэспублікі Беларусь аб адміністрацыйных правапарушэннях за парушэнне пешаход можа заплаціць штраф ад 1 да 3 базавых велічынь. А калі парушальнік знаходзіцца ў стане алкагольнага ап’янення або ў стане, выкліканым спажываннем наркатычных сродкаў, псіхатропных, таксічных або іншых адурманьвальных рэчываў, то максімальны штраф складзе 5 базавых велічынь.