Датэрмінова галасаваць пакуль ідуць у асноўным людзі старэйшага ўзросту – назіральнік

Выбары – адна са значных падзей, якія фарміруюць жыццё грамадзяніна і ўсёй краіны, нельга заставацца ў баку ад гэтага. Такім меркаваннем падзялілася назіральніца выбарчага ўчастка № 2 у Магілёве Ларыса Джафарава.

Яна акрэдытаваная як назіральнік ад прафсаюзнай арганізацыі работнікаў адукацыі і навукі. «Гэта другая выбарчая кампанія, у якой я назіральнік. У першы раз у такім статусе працавала на гэтым жа ўчастку на выбарах у мясцовыя Саветы дэпутатаў, – падзялілася жанчына. – Тады ўсё прайшло без якіх-небудзь складанасцей. Думаю, і гэтым разам будзе гэтак жа».

Паводле слоў Ларысы Джафаравай, першы дзень датэрміновага галасавання прайшоў на ўчастку без пазаштатных сітуацый. «Большая частка тых, хто галасуе, – гэта людзі старэйшага ўзросту. Выбары прызначаны на выхадны дзень, і ў многіх могуць быць планы: хтосьці з унукамі, хтосьці закрывае дачны сезон. Менавіта так аргументавалі свой выбар грамадзяне, якія прыйшлі прагаласаваць загадзя. Ніякіх парушэнняў у ходзе галасавання не было», – расказала назіральніца.

Усе назіральнікі праходзілі спецыяльнае навучанне, яны не маюць права ўмешвацца ў ход галасавання, праводзіць агітацыйную працу. «Мы павінны сачыць за тым, каб не было ніякіх парушэнняў. У нас вялікі ўчастак, куды ўваходзяць жыхары шматкватэрных дамоў і прыватнага сектара, але амаль усе адзін аднаго ведаюць. Таму выбарчая кампанія павінна прайсці ў сяброўскай абстаноўцы», – лічыць Ларыса Джафарава.

Усяго ў Магілёўскай вобласці ад прафсаюзных арганізацый акрэдытавана 1 169 назіральнікаў. На сённяшні дзень у Магілёве датэрмінова прагаласавала 3,18% , па рэгіёне – 4,63%.

БЕЛТА