Датэрміновае галасаванне па выбарах дэпутатаў у Палату прадстаўнікоў стартуе 12 лістапада

Датэрміновае галасаванне па выбарах дэпутатаў у Палату прадстаўнікоў Нацыянальнага сходу Рэспублікі Беларусь сёмага склікання пройдзе 12–16 лістапада. Пра гэта паведаміў сёння на прэс-канферэнцыі старшыня Магілёўскай абласной выбарчай камісіі Валерый Берастаў.

Як паведамілі ў Магілёўскай абласной выбарчай камісіі, у рэгіёне працу пачнуць 703 участкі для галасавання. У дні датэрміновага галасавання яны будуць працаваць з 10.00 да 19.00 з перапынкам з 14.00 да 16.00. Аддаць свой голас у падтрымку тых ці іншых кандыдатаў змогуць усе, хто па тых ці іншых прычынах не будзе мець магчымасці прыйсці на выбарчыя ўчасткі 17 лістапада.

Пры сабе неабходна ў абавязковым парадку мець дакументы, якія сведчаць асобу. Бюлетэнь выдаецца выбаршчыку, уключанаму ў спіс, пры прад’яўленні пашпарта грамадзяніна Рэспублікі Беларусь або аднаго з ніжэйзгаданых дакументаў:

– ваеннага білета (для вайскоўцаў тэрміновай службы);

– службовага пасведчання дзяржаўнага служачага;

– вадзіцельскага пасведчання;

– пенсійнага пасведчання або пасведчання інваліда (пры наяўнасці ў ім фатаграфіі);

– студэнцкага білета;

– даведкі органаў унутраных спраў (для грамадзян, якія згубілі пашпарт).

Пры атрыманні бюлетэня выбаршчык распісваецца ў адпаведнай графе спісу выбаршчыкаў.

Дарэчы, датэрміновае галасаванне не будзе ажыццяўляцца на тых участках, якія ўтвораны ў бальніцах, санаторыях і санаторна-курортных установах, а такіх у Магілёўскай вобласці 36. Асаблівасць іх працы заключаецца ў тым, што спісы выбаршчыкаў там сфарміруюць не за 15 дзён да даты выбараў, а за 2 дні.