Рус Бел Eng 中文

Фінал абласнога агляду-конкурсу аматарскіх тэатральных калектываў «У далонях маёй Беларусі» пройдзе ў Магілёве 9 красавіка

Фінал абласнога агляду-конкурсу аматарскіх тэатральных калектываў «У далонях маёй Беларусі» пройдзе ў абласным цэнтры 9 красавіка. Прадстаўленне пачнецца ў 17.30 у канцэртнай зале «Магілёў», паведамілі ў абласным метадычным цэнтры народнай творчасці і культурна-асветнай працы.

У мерапрыемстве прымуць удзел найлепшыя аматарскія тэатральныя калектывы рэгіёна, якія сталі пераможцамі па выніках трох занальных конкурсных праглядаў. Так, народны тэатр, дзіцячая тэатральная студыя Палаца культуры вобласці прадставіць урывак са спектакля «Старажытныя гравюры». Народны тэатральны калектыў «Крыніца» раённага цэнтра культуры Цэнтралізаванай клубнай сістэмы Быхаўскага раёна пакажа ўрывак са спектакля па п’есе «Сваё». Пастаноўку «Сюрпрыз, або новая казка Дамавіка» прывязе народны тэатр «Прамень» раённага цэнтра культуры Цэнтралізаванай клубнай сістэмы Хоцімскага раёна. Народны тэатр Краснапольскага раённага Цэнтра культуры Цэнтралізаванай клубнай сістэмы Краснапольскага раёна прадэманструе ўрывак са спектакля «Слуп» па п’есе Васіля Ткачова. Народны тэатр «Надзея» раённага цэнтра культуры і вольнага часу Цэнтралізаванай клубнай сістэмы Асіповіцкага раёна падорыць гледачам урывак са спектакля па п’есе Андрэя Карэліна «Герда, або Горад, у якім мы будзем шчаслівыя». Узорны музычны тэатр «Слугі трох муз» палаца мастацтваў Бабруйска прадставіць урывак са спектакля «Пакліч мяне ў неба».

Па выніках выступленняў журы вызначыць пераможцаў і ўручыць ім дыпломы I, II, III ступеняў. Таксама прадугледжаны ўзнагароды ў спецыяльных намінацыях: «Яркі дэбют», «Найлепшая мужчынская роля», «Найлепшая жаночая роля», «Найлепшы спектакль для дзяцей», «За арыгінальнасць трактоўкі матэрыялу пастаноўкі», «За папулярызацыю і захаванне творчасці беларускіх класікаў». Астатнім фіналістам уручаць дыпломы ўдзельнікаў.

Пры выкарыстанні матэрыялаў актыўная гіперспасылка на mogilev-region.gov.by абавязковая