Хрэсны ход адбудзецца 14 ліпеня ў Бабруйскім раёне

Мерапрыемствы, прысвечаныя прастольнаму святу храма ў гонар палажэння рызы Прасвятой Багародзіцы, адбудуцца 14 ліпеня ў аграгарадку Гарбацэвічы Бабруйскага раёна. Пра гэта паведамілі ў Бабруйскай епархіі.

Праграмай запланаваны хрэсны ход ад Свята-Іверскага храма ў Кісялевічах да Гарбацэвічаў, які пачнецца ў 11.30. Удзельнікам працэсіі неабходна мець пры сабе галаўны ўбор, зручны абутак, лёгкі плашч або парасон, ваду.

У храме ў гонар палажэння рызы Прасвятой Багародзіцы ў 14.30 адбудзецца вадасвятны малебен перад цудатворнай Гарбацэвіцкай іконай Божай Маці. Пасля гэтага пройдзе святочны канцэрт.

Дарэчы, удзельнікам мерапрыемства дапамогуць бясплатна дабрацца дадому. А 17.00 адправіцца аўтобус па маршруце Гарбацэвічы – Свята-Іверскі храм – аўтавакзал Бабруйска.

Ікона Божай Маці «Гарбацэвіцкая» з'яўляецца старажытнай заступніцай бабруйскай зямлі. Яна была яўлена ў пачатку XVII стагоддзя ў вецці ліпавага дрэва. Менавіта на гэтым месцы быў пабудаваны храм у гонар палажэння рызы Прасвятой Багародзіцы. Пра цуды абраза захаваны шматлікія сведчанні, пра якія рабіліся запісы ў спецыяльнай кнізе парафіі. Святыня была страчана ў гады ганенняў на Царкву ў XX стагоддзі. Дакладная копія старажытнага абраза была асвечана ўладыкам Серафімам у 2013 годзе ў Гарбацэвічах