Рус Бел Eng 中文

Інавацыйны беларуска-расийскі ліфт прэзентавалі ў Маскве

Інавацыйны ліфт сумеснай вытворчасці беларускага ААТ «Магілёўліфтмаш» і расійскага АТ «Воздухотехника» прэзентавалі ў Маскве.

Навінка стала вынікам мемарандума, падпісанага год таму паміж двума прадпрыемствамі. «Магілёўліфтмаш» даўно прысутнічае на расійскім рынку, займаючы тут адну з лідзіруючых пазіцый у галіне. АТ «Воздухотехника» з’яўляецца структурным падраздзяленнем будаўнічага комплексу Масквы.

На прэзентацыі Надзвычайны і Паўнамоцны Пасол Беларусі ў Расіі Уладзімір Сямашка адзначыў, што гэты праект з’яўляецца новым этапам узаемадзеяння ў галіне прамысловай кааперацыі з наступнай лакалізацыяй вытворчасці ліфтаў «Магілёўліфтмаша» на пляцоўцы «Воздухотехники». «Серыйны выпуск па пацверджаннях вытворчасці прамысловай прадукцыі на тэрыторыі Расіі дазволіць максімальна задаволіць патрэбы забудоўшчыкаў на канкурэнтнай аснове, уключаючы праграму рэнавацыі жылога фонду Масквы», – сказаў дыпламат.

Паводле слоў пасла, бакі ўжо завяршылі арганізацыйны этап, стварылі СП. Зараз ужо зроблены першы ўзор прадукцыі, да 1 жніўня павінна завяршыцца працэдура яе сертыфікацыі. Беларускі бок прадаставіў сваім маскоўскім партнёрам канструктарскія распрацоўкі, пастаўляе механіку, электроніку, сілавую частку, іншыя камплектуючыя. Навінка адрозніваецца плаўнасцю механізму ўваходу і закрыцця дзвярэй, у ёй ужыты антывандальныя элементы.

СП будзе выпускаць лінейку ліфтаў грузападымальнасцю ад 400 кг да 2,5 т. Уладзімір Сямашка паведаміў, што ў прадпрыемства ўжо ёсць заказ на выраб першай партыі ў 30 адзінак прадукцыі. У бягучым годзе на Маскоўскай пляцоўцы плануецца выпусціць 500 ліфтаў, у наступным – каля тысячы. Запланаваны аб’ём вытворчасці – да 10 тыс. адзінак на год. «Гэты праект выгадны як расійскаму вытворцу, так і беларускаму боку», – падкрэсліў пасол.

У прэзентацыі таксама прынялі ўдзел член Калегіі (міністр) па прамысловасці і аграпрамысловым комплексе Еўразійскай эканамічнай камісіі Аляксандр Субоцін, генеральны дырэктар АТ «Воздухотехника» Алег Максакаў, намеснік генеральнага дырэктара ААТ «Магілёўліфтмаш» Сяргей Чарткоў, прадстаўнікі Міністэрства прамысловасці і гандлю Расіі, урада Масквы, Расійскай гандлёва-прамысловай палаты, Расійска-беларускага дзелавога савета.

Штогод у Расіі усталёўваецца каля 40 тыс. ліфтаў. Прычым у апошні час гэтая лічба ўзрасла на 15%. Практычна 90% складаюць ліфты беларускай і расійскай вытворчасці. Да 2020 года ў адпаведнасці з патрабаваннямі тэхнічнага рэгламенту Еўразійскага эканамічнага саюза ў Расіі павінна быць цалкам заменена састарэлае ліфтавае абсталяванне. На 1 красавіка ў жылых дамах у гарадах Расіі больш за 110 тыс. ліфтаў адпрацавала свой нарматыўны тэрмін службы – гэта чвэрць усяго ліфтавага парку. Акрамя таго, значна павялічыўся попыт на ліфты ў сувязі з пачаткам рэалізацыі ў Маскве праграмы рэнавацыі жылля.

Фота пасольства Беларусі ў Расіі

БЕЛТА

 

Пры выкарыстанні матэрыялаў актыўная гіперспасылка на mogilev-region.gov.by абавязковая