Пераможцам рэспубліканскай спартыўна-патрыятычнай гульні «Зарнічка» стаў атрад «Спадчыннікі» з сярэдняй школы №8 Магілёва. Пра гэта паведаміла старшыня Магілёўскага абласнога савета ГА «Беларуская рэспубліканская піянерская арганізацыя» Алена Малдаванава.

Фінал «Зарнічкі», у якім удзельнічалі акцябрацкія дружыны з усіх рэгіёнаў краіны, прымаў Барысаў. Спаборніцтвы былі арганізаваны ў найлепшых традыцыях армейскага жыцця: акцябраты жылі ў казармах па распарадку, паўдзельнічалі ў дзесяці спаборніцтвах – агляд строю, інсцэніроўка ваеннай песні, «размініраванне снарадаў», «дастаўка сакрэтнага пакета», манеўраванне праз «балота». У нялёгкай, але сумленнай барацьбе нашы хлопцы занялі першае месца.

Гульня «Зарнічка» праводзіцца з мэтай выхавання пачуцця патрыятызму, фізічнага развіцця малодшых членаў піянерскай арганізацыі, фарміравання здаровага ладу жыцця з дапамогай рухомай гульнявой дзейнасці і далучэння да заняткаў ваенна-прыкладнымі відамі спорту. Сёлета спаборніцтвы былі прысвечаны 75-годдзю вызвалення Беларусі ад нямецка-фашысцкіх захопнікаў.