Кандыдатамі ў дэпутаты ў Беларусі вылучылася ўжо 70 чалавек

Паводле даных на 30 верасня, кандыдатамі ў дэпутаты Палаты прадстаўнікоў сёмага склікання вылучылася 70 чалавек. Такая інфармацыя размешчана на сайце Цэнтрвыбаркама.

Большасць прэтэндэнтаў на дэпутацкі мандат – 81,4 % – аддалі перавагу вылучацца адным з трох магчымых спосабаў (шляхам збору подпісаў, ад працоўнага калектыву, ад палітычнай партыі), астатнія скарысталіся двума.

Палітычныя партыі да гэтага часу вылучылі 43,4 % патэнцыйных кандыдатаў у дэпутаты. Больш за ўсё сярод іх прадстаўнікоў Ліберальна-дэмакратычнай партыі (22,9 %), Камуністычнай партыі Беларусі (15,7 %), Рэспубліканскай партыі працы і справядлівасці (5,7 %).

Жанчыны сярод удзельнікаў выбарчай гонкі складаюць 27,1 %, маладыя людзі да 30 гадоў – 4,3 %. Паспрабуе пераабрацца 10 дэпутатаў Палаты прадстаўнікоў дзеючага склікання (14,3 %). Даволі многа сярод прэтэндэнтаў на месцы ў парламенце дэпутатаў мясцовых Саветаў – 2,9 % ад агульнай колькасці.

ЦВК прадаставіў таксама інфармацыю аб прафесійнай дзейнасці вылучэнцаў. Так, занятых у прамысловасці, будаўніцтве, сферы транспарту сярод іх 21,4 %, прадстаўнікоў навукі, адукацыі, аховы здароўя, культуры і спорту – 20 %, дзяржслужачых – 15,7 %.

Вылучэнне кандыдатаў у дэпутаты працягнецца па 7 кастрычніка ўключна. Выбары ў Палату прадстаўнікоў прызначаны на 17 лістапада, у Савет Рэспублікі – на 7 лістапада.