Белетэлерадыёкампанія вядзе актыўную падрыхтоўку маштабнага тэлевізійнага праекта X-Factor, які ўпершыню будзе рэалізаваны ў нашай краіне і выйдзе ў эфіры тэлеканала «Беларусь 1» восенню гэтага года.

Кастынгі музычнага шоу талентаў пройдуць і ў Магілёўскай вобласці: 21–22 сакавіка – у Магілёве (Палац культуры вобласці), 26 красавіка – у Бабруйску (абласны тэатр драмы і камедыі імя В. І. Дуніна-Марцінкевіча). Пачатак рэгістрацыі–у 10.00. Фінальныя праслухоўванні плануецца правесці ў Мінску ў маі.

Прэтэндэнтаў будуць ацэньваць у чатырох катэгорыях: моладзь ад 16 да 24 гадоў (асобна юнакі і дзяўчаты), удзельнікі ад 25 гадоў і старэйшыя, вакальныя калектывы. Хто будзе ў журы, пакуль інтрыга, а ў фінале пераможцу беларускага «Х-фактара» выберуць гледачы.

X-Factor–адзін з самых паспяховых тэлепраектаў па пошуку вакальных талентаў, які ўжо быў рэалізаваны ў 56 краінах. Яго паглядзела ў тэлеэфіры больш за 500 млн.чалавек. Беларускія музыканты, у тым ліку з Магілёва, удзельнічалі ў версіях X-Factor. Так у 2017 на ўкраінскім шоу выступала салістка Jazz City Band Ганна Трубяцкая. Магіляўчанка пакінула праект за крок ад фіналу, саступіўшы ва ўпартай барацьбе ўкраінскай групе Kazka – той самай, што пасля заваявала міжнародны поспех з песняй «Плакала».