Людзям з абмежаванымі магчымасцям важна ствараць умовы для самарэалізацыі – Лідзія Ярмошына

Старшыня ЦВК, член Прэзідыума Беларускага саюза жанчын Лідзія Ярмошына падкрэсліла важнасць стварэння ўмоў для самарэалізацыі людзей з абмежаванымі магчымасцямі. Пра гэта яна заявіла на выязным семінары ў Магілёве з удзелам дэпутатаў і прадстаўнікоў Беларускага саюза жанчын.

«Адным з кірункаў дзейнасці Беларускага саюза жанчын з’яўляецца выхаванне міласэрнасці ў дзяцей і падрастаючага пакалення. Таму падтрымка і стварэнне ўмоў для самарэалізацыі людзей з абмежаванымі магчымасцямі – вельмі важная тэма, у тым ліку для дасягнення мэтаў устойлівага развіцця, – сказала Лідзія Ярмошына. – Мяне сёння прыемна ўразіў Магілёўскі спецыялізаваны дом дзіцяці. Гэта сапраўды сацыяльная ўстанова найвышэйшага гуманітарнага ўзроўню. Тут з вялікай любоўю ставяцца да дзяцей-інвалідаў, і гэта прыклад для ўсіх астатніх».

Лідзія Ярмошына са шкадаваннем канстатавала, што ў грамадстве тэма людзей з абмежаванымі магчымасцямі часам замоўчваецца. Аднак трэба садзейнічаць сацыяльнай адаптацыі гэтай катэгорыі людзей. «Таму, я думаю, гэтая паездка, паколькі тут удзельнічаюць і нашы парламентарыі, будзе спрыяць дасягненню мэтаў гуманізацыі нашага грамадства», – дадала прадстаўнік БСЖ.

Падчас дыскусіі ў Магілёўскім аблвыканкаме падкрэслівалася, што падтрымка людзей з абмежаванымі магчымасцямі ў Беларусі з’яўляецца адным з прыярытэтаў дзяржаўнай палітыкі. Гэта стала сістэмнай працай як у плане адукацыі, сацыяльнай адаптацыі названай катэгорыі людзей у грамадстве, так і іх працаўладкавання.

Дэпутат Вольга Петрашова, якая прадстаўляе Пастаянную камісію па міжнародных справах, старшыня першаснай арганізацыі БСЖ Палаты прадстаўнікоў лічыць, што Магілёўская вобласць можа быць прыкладам высокага прафесійнага ўзроўню арганізацыі працы па стварэнні ўмоў для інтэграцыі людзей з абмежаванымі магчымасцямі ў грамадства, каб яны мелі магчымасць навучацца, атрымліваць прафесіі, працаўладкоўвацца і ствараць сем’і. «Галоўным жа вынікам нашай сумеснай працы – мясцовых органаў улады, Беларускага саюза жанчын, парламентарыяў, грамадскасці і іншых зацікаўленых – павінна стаць тое, каб нашы грамадзяне, якія маюць катэгорыю інваліднасці, адчувалі сябе камфортна, былі запатрабаваны ў дзяржаве і грамадстве», – падкрэсліла яна.

Вольга Петрашова звярнула ўвагу, што ў Беларусі створана добрая заканадаўчая база па сацыяльнай і працоўнай інтэграцыі асоб з абмежаванымі магчымасцямі, і яна пастаянна ўдасканальваецца. Толькі ў бягучым годзе парламентарыямі ўнесены цэлы шэраг змяненняў у розныя заканадаўчыя акты, накіраваныя на ўзмацненне дзяржаўнай падтрымкі сем’яў, якія выхоўваюць дзяцей-інвалідаў, паляпшэнне якасці жыцця людзей з абмежаванымі магчымасцямі і стварэнне ўсіх умоў па паспяховай інтэграцыі іх у грамадства. «Мы будзем працягваць такую працу, а атрыманы вопыт у Магілёўскай вобласці несумненна надасць новы імпульс развіццю гэтай тэмы, рэалізацыі новых адукацыйных і сацыяльных праектаў», – сказала дэпутат.

Семінар быў прысвечаны тэме «Рэалізацыя праграм падтрымкі, сацыяльнай і працоўнай інтэграцыі асоб з абмежаванымі магчымасцямі ў Магілёўскай вобласці: вопыт, праблемы, перспектывы». Падчас наведвання сацыяльных устаноў абласнога цэнтра ўдзельнікі разгледзелі вопыт працы па паляпшэнні якасці жыцця людзей з інваліднасцю і прасоўванні іх інтарэсаў у грамадстве. Парламентарыі вывучылі практыку распрацоўкі і апрабацыі мадэлі аказання паліятыўнай дапамогі дзецям з цяжкімі формамі інваліднасці і іх сем’ям, а таксама рэалізацыі рэспубліканскага інавацыйнага праекта «Укараненне мадэлі фарміравання маральных каштоўнасных арыентацый навучэнцаў з дапамогай арганізацыі валанцёрскай дзейнасці ў сістэме ўзаемадзеяння ўстаноў адукацыі, дзіцячых і моладзевых аб’яднанняў».

На прыкладзе Магілёўскага эканамічнага прафесійна-тэхнічнага каледжа быў прадстаўлены вопыт работы па арганізацыі працоўнай дзейнасці як фактару паспяховай сацыяльнай інтэграцыі асоб з абмежаванымі магчымасцямі.

Тэкст – БЕЛТА

Фота - уласныя