Магіляўчанка Вольга Бадзелька прызнаная найлепшай шахматысткай краіны 2018 года

Беларуская федэрацыя шахмат назвала найлепшых спартсменаў краіны па выніках 2018 года. Цырымонія ўзнагароджання адбылася на ўрачыстым закрыцці XVII міжнароднага шахматнага фестывалю ў Оршы, паведамляе сайт ГА «БФШ».

Пераможцаў вызначылі ў 25 намінацыях. Так, найлепшай спартсменкай 2018 года стала Вольга Бадзелька. Яна ж прызнаная найлепшай спартсменкай да 18 гадоў.

Акрамя таго, былі ўручаны грашовыя сертыфікаты прызёрам чэмпіянатаў Еўропы мінулага года. Сертыфікат на Br2 тыс. атрымала сярэбраны прызёр ЧЕ па шахматах сярод дзяўчат Вольга Бадзелька. Сродкі можна выкарыстоўваць для падрыхтоўкі да чэмпіянатаў свету і Еўропы бягучага года.

Вольга Бадзелька нарадзілася 8 ліпеня 2002 года ў Магілёве. Жаночы міжнародны майстар, рэйтынг Эло на 1 студзеня – 2399. Шматразовая чэмпіёнка свету і Еўропы ў сваім узросце. Займае 4-ю пазіцыю сярод наймацнейшых па рэйтынгу юніёрак свету. Уваходзіць у топ-100 наймацнейшых па рэйтынгу шахматыстак планеты.

Фота - openchess.by